〖🇬🇧期待已久的聖誕氣氛〗

琴日同老公出去Southampton行咗轉,除咗為新居添置家品之外,亦係想出去散下心享受一下weekend~一個朝早都無咩特別,只係見到有幾條街上嘅街燈有啲疑似係燈飾嘅物體,不過日光日白,我連佢係咩pattern都睇唔到😂 只係見到幾條鐵線圍住個燈柱,心諗:「吓?就咁㗎咋?唔係呀嘛……今年都好hea吓喎……」好失望。


我同老公行到唔知時間,覺得有啲肚餓再望吓個鐘先知原來夠鐘去食晚飯啦!所以我哋去咗附近一間中餐館食飯,呢間中餐館其實我哋都食過幾次,之前幾次都無咁好食,琴晚唔知發生咩事!水準一流!我哋一共叫咗8個餸連炒飯(好誇張,不過我哋食得哂,係咪好大食呢~?),雖然可能無人想知,不過我都好想分享下我哋叫咗咩餸😋 :辣子雞🌶、生炒排骨🐖、福建炒飯🍲、客家蛋角煲🍳、香芋扣肉煲🐷、魚香茄子玉子豆腐煲🍆、枝竹羊腩煲🐑、蒜蓉炒白菜🥬。老公最鐘意食福建炒飯,佢話係充滿兒時回憶嘅炒飯,但係係英國邊到都食唔返香港果種味,不過佢都大讚呢一間炒得好好味!👍🏻我都覺得呢一晚嘅晚餐好有驚喜,所以我哋兩個都食到好似懷有5個月身孕咁😂 抱住個肚行出餐廳~


食完飯,諗住去行吓呢排延長咗營業時間嘅Primark,順便散吓步因為食得太飽啦~點知一落街超有驚喜!!!路邊棵樹亮咗燈!!成條街都亮咗燈!!!勁靚囉!!!完全無諗過咁都俾我見到聖誕樹🎄曾經一度以為今年英國會無乜氣氛而好失落嘅我即刻超開心~真係好有聖誕節嘅氣氛~我都忍唔住即刻要同老公影張靚相🥰 我仲以為今年無機會㗎啦,2次lockdown再加上疫情嚴重,不過果然聖誕節對於英國人嚟講真係好重要,所以佢哋完全無放棄過呢個節日~多謝大家無放棄到,我先可以再一次係英國感受到我最愛嘅節日呀🎄🎅🏻


就係咁,我都提返起精神,決定要再買多啲裝飾佈置屋企先得!!係呢到同大家分享一下美景,一同感受英國嘅聖誕氣氛💕 好期待呀~希望聖誕節快啲到啦!🥰


———————————————————————— 🔻瀏覽更多英國資訊🔻 instagram @jessica_uklife: https://instagram.com/jessica_uklife YouTube @Jessica_UKLife : https://www.youtube.com/c/JessicaUKLife Facebook @Jessica_UKLife: https://www.facebook.com/jessica.uklife MeWe @Jessica_UKLife: https://mewe.com/i/jessicauklife ★港英匯館 Blog ★ https://www.hongkongers.co.uk/profile/jessicauklife 回顧 ☆Jessica_UKLife☆其他文章: https://www.facebook.com/109122070867681/posts/156494026130485/?d=n ———————————————————————— #英國 #英國日常 #英國生活 #英國移民 #移居英國 #居英生活 #BNO #BNO平權 #BNOVisa #UnitedKingdom #UK #HK #HongKong #HomeKong #UKlife #Portsmouth #UKDaily #daily #wifeylifeinUK #blogger #ukblogger #hkblogger #Jessica_UKLife #英國聖誕 #聖誕節 #Christmas #ChristmasTree

39 次瀏覽0 則留言

最新文章

查看全部