為寵物辦移民不要忽略毛孩的感受

關於寵物移民,唔能夠忽略嘅一個步驟 -【寵物傳心】 信不信由你


我相信每個人一出生都識傳心,只係長大後學懂「語言」,就慢慢忘記呢種與生俱來嘅溝通方式。傳心同宗教無關,而坊間都有唔少人話傳心係呃人騙神騙鬼,我覺得⋯⋯well⋯⋯自己衡量吧!


好多準備移民嘅人都打算帶埋佢哋嘅毛孩移民,唔怕煩可以自己處理,怕煩可以選擇搵寵物移民公司做,而我就係好怕煩嗰位!


原本真係以為搞好文件,打好晶片,送隻貓上機,door to door過到去英國見面,所有嘢非常簡單!但係有次同一位有經驗嘅朋友傾開,佢提醒我搭飛機對寵物嚟講係一件非常非常驚嚇嘅事情,所以一定要先俾心理準備佢,等佢知道嚟緊會有一件咁大嘅轉變!


其實我不嬲都相信有寵物傳心呢一回事,再加上朋友第一身有幫寵物傳心嘅經驗,令我確信透過心靈感應溝通,會可以解決到寵物嘅一啲行為問題。


我係經朋友介紹,搵到 Tarot ※ AC by Clara 克萊拉 の塔羅※動物傳心 幫手!佢幫佳之總共做咗三次傳心 (AC),頭兩次係上飛機前,最後一次係過到嚟英國之後~


以下為Clara同佳之嘅傳心過程(長文) -----

【第一次傳心】嗰晚,佳之以女皇姿態同Clara傾計。佳之性格剛強、高傲、不知「貓」間疾苦。唔鍾意俾我哋摸,覺得係煩多過舒服(唔怪得永遠摸唔夠3下就會咬我哋)屋企如果人多佢唔鍾意,但無人理佢佢又唔高興!佳之覺得自己不受重視,悶悶不樂。佢唔知我哋成日喺度做緊乜嘢(嗰排屋企pack箱,非常混亂!)可以嘅話佢都鍾意收埋自己,自己望住隻窗諗嘢。佳之鍾意曬太陽,鍾意一粒粒深啡色的零食/食物(佢嘅餅餅)我問點解細個佢鍾意食貓罐罐,大個後突然唔食了?佳之話俾Clara知佢細個時俾咩佢就食咩,長大後覺得黐牙,麻煩,就唔食了,而餅餅又好食。佳之要Clara話俾我哋知,佢有唔同了,有轉變了,我哋都要一樣(睇到呢度,我已經有啲眼濕濕)然後Clara解釋咗好多關於我哋嘅事情俾佳之聽,亦都俾佢知道其實我哋好愛佢好錫佢。而神奇嘅事情發生了


由博博出世之後,佳之幾乎無上過我哋張床搵我哋,傳心嗰晚半夜佢竟然走上張床喵我哋,又舔我哋!真係毛管都棟埋 嗰次之後,好似解開咗佳之嘅心結,佢知道我地搵Clara去同佢溝通,感覺被重視,所以開心。我哋同時了解咗佳之諗法,就更加懂得同佢相處,真係好明顯感覺到佢親和咗,無之前咁孤僻,亦會主動嚟撩吓我哋


【第二次傳心】係喺臨上機前兩日,傳心師同佢講嚟緊要上飛機,飛機上會好黑好嘈、但爸B媽咪都係喺佢隔離嘅啫,只係唔俾點郁,到時有爸B媽咪嘅朋友睇住佢,唔好以為佢哋係陌生人,保持冷靜就唔駛驚!Clara「傳」咗幾張英國間屋嘅相、同埋飛機嗰個籠同埋飲水機俾佳之睇,等佢有心理準備。


佳之當晚傳心反應好冷靜,佢話佢未試過呢個情況,但佢同Clara講佢會盡力!


Clara話返俾我知,第二次傳心嘅佳之,比起第一次無咁「高高在上」了,亦都變得和善好多!佳之心裡面想同我哋講嘅說話得到舒暢,我哋明白同了解多咗,又感到我哋同佢相處有唔同,當然就開心咗!佳之無咗上一次嘅霸氣,但仍然想我哋尊重佢想做女皇嘅性格


到上飛機嗰日,寵物移民公司嘅人來接佢走,公司俾咗個籠我哋,佳之聞咗幾聞,竟然自己行咗入去 即刻令我諗起佢應承過「我會盡力」 但係我見佢真係好驚,震哂,之後上咗車,一直就同我哋搭同一班機飛去英國,英國見


【第三次傳心】係到埗後三日!佳之落機嗰日之前完全係判若兩貓 佢好驚、匿埋係二樓唔落嚟唔周圍行、唔食唔痾唔飲水,一有少少聲就即刻震,望到我哋好心痛 要格硬抱佢去先痾第一篤wee,同埋肯飲第一啖水,但之後都係唔肯再飲再食了。我好擔心,好怕再咁落去佢會屈到病,急急同Clara報告情況,Clara叫我影下貓砂、水機同食物盤的位置俾佢,然後佢馬上同佳之傳心!


Clara話我知,佳之第一句就話「佢睇唔到街景」 係!我哋以前住39樓,佳之鍾意係窗邊望街望車望雀,而家住地下,風景無咁遠,而且未買嗰啲可以俾佢跳高嘅貓樹樹,加上我哋出咗街會關窗簾,所以佢乜都無得睇,佢話「無郁嚟郁去嘅嘢睇」


佳之第二句說話「Nu Nu姐姐不見了」 工人姐姐唔見咗,無人服待佢,感覺皇后地位唔見咗!仲有其他小疑惑⋯⋯


嗰日我即刻開哂窗簾,抱佢上去唔同房間嘅窗邊睇街景,又買好多唔同新貓糧/零食俾佢試,一步一步氹佢,果晚佢終於肯全屋走周圍探索,雖然仲係好驚,但佢起碼唔係收埋自己係二樓!


而家嚟咗三星期了,食瞓痾都正常返哂,心情好似越嚟越好,慢慢適應了!


打咗咁長遍文章唔係想講傳心有幾利害,只係想提醒一下打算帶寵物過嚟嘅朋友,當你著緊小朋友會唔會適應外地生活之餘,用咩方法都好,唔好忽略毛孩嘅感受,因為佢哋真係無法表達自己。


---------- 如果想DIY寵物移民,我推介 帶兩隻貓移民英國 同埋 英國移民知多啲,成功簽證小技巧 嘅文章: https://www.facebook.com/2catsinUK/posts/920410788454477 https://www.oneimmigrationsolutions.com/....../how_to...... . . . #寵物移民 #寵物傳心 #香港毛孩生活在英國

- - - - - - - - - - Follow to stay tuned ❤️❤️ Facebook : https://www.facebook.com/ukbossmama Instagram : https://www.instagram.com/rachelwmt/

215 次瀏覽0 則留言

最新文章

查看全部