熟悉又陌生


英國係一個我同阿盧從未踏足過嘅國家(小女我都係今年先第一次踏出亞洲lol)兩條友一條狗帶住4個喼,心口掛住個勇字去一個完全未去過又無乜親友嘅國家,未出發前個心真係飄到上太空啊!唔係開始做下research 真係淨係識倫敦、曼聯、曼城、炸魚薯條喳...


英文又唔多好(我啫)又唔識睇波又唔飲啤酒,究竟我攪唔攪得掂咖?(話說個個屋企人都同阿盧講:你,我唔擔心啊細個已經出去見識過,果個我真係擔心佢會唔慣/0\)

由香港出發直到行出Manchester 機場,先相信我哋真係嚟到喇!(如果唔係支肺我會親吻大地囉lol)眼前嘅一切無令我有一種完全陌生嘅感覺(日本、韓國、泰國就會有陌生感,可能係文字嘅原因)。上咗uber一路望住街景,發現英國嘅馬路、路牌、紅綠燈都係同香港相似度99%,當時我仲大鄉里上身咁不停地 “哇!好似香港啊” 喺街到望住啲建築物望到目定口呆,實在太靚喇~ 雖然對於呢啲英式舊建築物印象唔算好深(半島酒店係我對英式建築物僅餘嘅印象)


除咗建築物,雙層巴士都係一樣令我感覺親切嘅嘢,雖然到而家都未搭過,但每次一有雙層巴士行過都好有親切感 😉 講完一堆熟悉嘅野都要講下啲陌生嘅啦,首先對我最陌生嘅係英國口音,用咗好多時間開始學識聽同習慣美式英文,嚟到呢到真係唔落足耳力都會miss 咗對方講乜 > < “嘰哩咕嚕 mate”

然後就到好多人擔心嘅天氣喇 “英國成日落雨、大風、天陰陰” 的而且確係,但其實都有時間係好好太陽🌞, so far 喺Nottingham晴天嘅比例多過落雨(唔知之後係咪都係咁呢?)


到比較困擾我嘅飲食,聽人講”英國野食出名難食同貴”,難唔難食我就唔批評喇,但無乜選擇同貴就真嘅。首先我呢段時間都係住酒店,無得煮之餘仲要無微波爐,所以只可以食啲即食野(即係落熱水焗熟嗰種)再唔係就要出街食,呢到好興食沙律、bagel、sandwich、pizza,全部對我嚟講都係乾爭爭唔暖胃。向來唔好粉麵嘅我竟然想食有湯嘅嘢,最後仲去咗唐人行搵食 lol (講講下都想食/0\)


人去到陌生嘅地方就會不停地搵熟悉嘅野,不過我相信所有嘢只要open mind 啲就可以接受到。出面食野貴/無乜選擇咪屋企煮囉;聽唔慣口音聽多啲咪識囉;唔習慣天氣咪去南啲嘅city(聽聞天氣會好啲)... 心態決定心情!唔好比唔習慣嚇怕自己,只要決心夠大無嘢係解決唔到嘅 😉 香港人要發揮獅子山精神,加油!

245 次瀏覽1 則留言

最新文章

查看全部