移咗民嘅朋友,你哋會有同樣嘅感受嗎?


有一日我老公同我講「如果唔係識到你,我呢世都估唔到我會移咗民嚟英國」原來佢講緊,佢由細到大都係一個日本迷,未曾踏足英國,生意喺香港,家人喺香港,更加無諗過移民 (但最估唔到佢喺呢度 settle 得比我更好)。我諗,係咪啲老婆們都鍾意諗呢諗路,因為首先提出移民嘅,正正係我。




我自細就好嚮往外國生活,中學密友都知道我好鍾意英國 鍾意呢度嘅建築、鍾意呢度嘅歷史文化⋯⋯屋企 afford 唔到去外國留學,但諗吓都覺得開心!




偏偏我鍾意行啲唔係多數人鍾意行嘅路 (如果唔係點會創業),大學時期有機會揀地方 exchange,人哋個個去美國韓國,我走去揀法國 一個非英語系國家。我都唔記得點解唔揀英國喇,大概都係心諗,法國去英國好近啫,到時順便去旅行咪得囉!




喺法國短暫生活過後,發覺自己好犯賤地愛上呢個國家 (點解,可以睇睇 Emily in Paris,雖然情節太誇張,但本質都接近!我果陣成日話好欣賞法國人嘅自信) 所以當初揀移民地方時,除咗天氣宜人嘅澳洲之外,法國係我私心選揀之一!不過考慮到今次係移民,唔係去玩,要考慮嘅係落地生根、將來、生意、小朋友教育等等⋯⋯所以最終係命運嘅安排下,真係嚟咗呢個小時候已經好 fancy 嘅地方 - 英國。




到目前為止喺英國 settle 咗一段短時間,有時行出花園抬頭望上天空,天氣好時見到好多星星,條街好寧靜,而最近就不斷見到飄雪,一切一切,我仍然覺得好唔真實,正如 Hugh Grant 喺 <> 入面向 Julia Roberts 所講「surreal but nice」,正正喺完完全全表達緊我心裡面嘅感覺。


301 次瀏覽0 則留言

最新文章

查看全部