移民大作戰(三)之搵學校


之前講過,決定移民有七成係為咗二郎,所以搵學校絕對唔可以求其。一開始係希望太郎可以入state school,咁就可以有免費教育。但做完資料搜集之後,就發現英國state school都有唔同水準,可以從Ofsted Report睇到每間學校嘅評分同質素。同香港一樣,好學校會得到好多家長垂青,所以即使住得好近,都未必派到心儀嘅學校。何況我哋連住址都未有,又點申請呢?當然,如果落地之後再向council申請,太郎一定有書讀,但係就要睇吓到時邊間學校有位剩,純靠運氣。

另一個選擇係投考Grammar school,Grammar school都屬於state school,可以話係免費嘅精英學校。每年9月,Year 6嘅小朋友可以應考11+ exam,如果成績理想就可以入讀。睇到呢度,豬肉媽望吓太郎,再望吓個日曆都知唔使諗啦!

咁即係要向私校出發啦!呢度嘅私校叫做private school 或者independent school,一般可以理解為要交學費嘅學校。如果想知道independent school嘅質素,就要睇Independent School Inspectorate Report。仲有一種叫public school,千其唔好誤會public即係公立就即係免費。英國嘅Public school其實係學費好貴兼且好難考入嘅學校,較為人所熟識嘅有Eton College、Harrow School、Shrewsbury School等等。

我哋正式開始搵independent school嘅時候已經係11月,上網睇咗一大輪,都仍然好迷網,唯一令人安心少少嘅係independent school多數全年收生。由於唔熟行情,我哋都係搵教育顧問幫手。真係大鄉里,原來佢哋幫手搵學校係唔收錢嘅,不過就收UKiset考試費。顧問提議咗幾間喺Reading附近嘅學校,可能佢哋多數介紹boarding school,所以俾我哋嘅選擇唔多。於是我哋自己上網搵,之後就經佢哋報名。太郎總共報咗5間學校,全部都要考入學試同埋interview。有部份學校接受UKiset成績,有D就由教育顧問監考,再同學校做Skype interview。由於想睇清楚,同埋俾太郎感受吓,我哋仲飛咗去英國探路同埋參觀學校。雖然只係參觀校園見吓老師校長,但都非常值得。

返到香港之後就陸續收到取錄通知,最後喺年三十晚收到太郎最心儀嗰間學校嘅email。。。Yeah!收咗喇!

#英國教育 #逃離國教 #利多於弊

80 次瀏覽0 則留言

最新文章

查看全部