移民大作戰(四)之安樂窩


當選定學校之後,另一有迫切需要嘅項目就係住屋。除咗因為一家六口要有瓦遮頭之外,申請family visa都必須提供住址。曾經見過有人教租Airbnb,然後填嗰度地址;又有人話可以填親戚地址。不過我哋冇採用呢兩個方法,原因係有D risky,同埋如果填親戚朋友屋企地址,間屋要有足夠房間先算合格。當然有人會認為只係填個地址啫,Home Office都未必會查。但係我哋希望所有嘢老老實實,跟足規矩,唔想有任何差池。

咁就租間屋啦!始終初嚟報到,唔熟地頭,邊區係好區都唔知。因為身在香港,於是上網用Rightmove同Zoopla搵租盤。搵到啱心水嘅就email俾agent了解吓,同時安排飛過去睇樓。點知,D agent反應冷淡,有D知道我哋唔係local,就話好難搞。我印象中,英國D業主好揀擇,要睇好多證明。佢哋一般都唔願租俾非local,有部分業主會要求收半年租加埋有local擔保先肯租。而且佢哋冇一年死約一年生約呢支歌仔,個業住分分鐘可以半年後話唔租,咁租客就要搬走。諗諗吓我哋又驚驚哋,一家六口要搬嚟搬去點得呀?於是就一不做、二不休。。。買喇喂!

係呀,真係買呀!橫掂我哋都連根拔唔諗住走回頭路,咁就不如俾心機為自己建立一個真正嘅安樂窩啦!英國咁大,每個地方總有優點缺點。既然已經揀定學校,咁就喺太郎學校附近搵。我哋喺香港都住開比較偏遠嘅地區,所以落差唔太大。不過搵嘅時候都有留意交通網絡同社區設施,總之唔使揸半個鐘先有間超市就得。於是我哋不斷上網睇唔同嘅資訊同樓盤,大約睇咗一個月,就訂機票過去實地睇。去之前先約定agent日期時間,務求喺一星期內搵到購買目標。

呢次睇樓為主要目的,當然唔會帶埋二郎啦!星期日飛,一到步就攞車,因為冇車就真係好難睇屋。星期一開始每日都係睇屋,連續睇咗四日之後,終於shortlist咗三間,星期五睇第二次。好好彩,我哋搵到現時住緊嘅呢間屋。睇完第二次就即時表明購買意向並且還價。值得一提,喺offer to buy嘅時候,買家需要證明自己有購買能力。如果用現金買,就要證明手上有呢舊cash;如果做按揭,就要事先向銀行取得decision in principle,上網已經做到。當然有decision in principle並不代表銀行一定會批出貸款啦!

大家都知香港嘅物業代理係食兩家茶禮嘅,但係英國就唔同喇!只係賣家要俾佣,買家就一個崩都唔使俾,所以佢哋只為賣家服務。咁你可以想像到佢哋唔會幫你壓價,同埋英國嘅代理絕對冇香港嘅咁進取,亦唔會落太多嘴頭sell你。加上工作效率文化大不同,買屋呢個環節絕對係脾氣大考驗。

另一個極大嘅期望落差係成交期。第一段提到申請family visa需要提供住址,所以當我哋搵到心儀物業就梗係想盡快成交啦!但係事情並唔係咁簡單,咁梗係啦,世界上真係冇幾多個地方好似香港咁買樓。英國好多時都係chained property,顧名思意,買樓都有條鍊。如果個賣家買唔到佢想買嗰間屋,佢就賣唔到佢住緊嗰間俾你;又或者個買家嘅買家改變主意唔買,咁佢就冇錢買個賣家間屋,咁就有機會全條購買鍊告吹。

仲有,當賣家接受咗買家嘅offer之後,買家係完全唔使俾訂嘅,但要搵surveyor驗屋,搵律師做land search,如果做按揭就要搵銀行。咁即係話是但一方如果喺呢段時間縮沙都冇躂訂呢回事,不過買家就會蝕晒律師費同驗樓費。又或者做survey同land search 發現間屋有問題,例如水浸風險好高、有沉降問題、又或者間屋結構有問題,咁都唔敢買啦!假如一切順利,去到正式成交前約兩星期先會簽合約同埋交訂金,即係exchange of contract。Exchange of contract嘅大約兩星期之後,就係正式成交日。當日會正式攞到鎖匙,咁間屋就係你㗎喇!

齋睇都覺得煩,豬肉媽要寫番出嚟都有少少嘔血,可想而知當時有幾動魄驚心。由二月尾offer to buy開始,中間來來回回同物業代理、律師、銀行嘅email多不勝數,多數都係我哋催佢哋快D,或者發現佢哋做漏嘢,業主去咗旅行唔得閒覆等等等等。時間不斷流逝,又驚有變卦,又想早D遞visa申請。結果我哋要六月先攞到鎖匙,真係足足攪咗三個幾月,律師仲話已經算快。

#買賣物業大不同 #斷鍊 #其實算好彩

129 次瀏覽0 則留言

最新文章

查看全部