移民大作戰 (八 • 一) 之 裝修血淚史

移民大作戰 (八 • 一) 之 裝修血淚史

好耐冇update個page,皆因呢排非常忙碌。太郎次郎開學,加上屋企裝修工程接近尾聲,所有嘢都濕濕碎碎。好難得先可以坐定定,開始寫吓應承咗大家要寫嘅裝修血淚史,而呢段血淚史到呢一刻(九月尾)仍然未完。一年以來我哋遇過壞人、大話精、山草藥、甩底王……連builder都用咗兩個。

回帶返去2019年6月收樓,攞到鎖匙就當然要開始諗吓間屋點執。豬肉媽當時希望可以裝修好間屋,等家人過到嚟可以萬事俱備、安安樂樂入住。所以我都曾經狂想過,收樓嗰次可以搵埋builder,講好點裝修,然後交低鎖匙,返香港遙控,咁我哋land嘅時候咪可以即刻有新裝修嘅屋住,而又唔使食塵囉?

你哋係唔係都有咁諗過呢?我可以話你知係冇可能嘅,呢度係英國,唔係香港,唔好妄想。所以我收樓時只係搵清潔公司大洗咗一次,買好床褥、洗好床單同埋準備少量日用品就算。咁樣起碼飛到過嚟嘅第一晚就可以沖個涼,瞓一覺先開始慢慢安排其他嘢。

買屋嘅時候,除咗location之外,內櫳當然都非常重要。Home improvement project喺英國非常普遍,除咗粉飾內櫳之外,佢哋都會進行擴建,或者將車房改成房間。大家都知道要搵到合眼緣嘅屋並唔容易,要百份百合心水就難上加難。所以如果可以根據自己意願改建一下間隔,都唔錯㗎!

豬肉媽家有兩寶,行樓梯對佢哋嚟講會比較具挑戰性,所以買屋嘅時候已經決定要將車房改建為套房。一家六口,最開心當然係齊齊整整食飯啦!要坐得舒服、容易夾餸、方便傾偈,就梗係要張圓枱嘅。於是我哋又想要個大少少嘅飯廳。屋企咁多人,每人每日洗一件衫都六件啦!咁為咗方便洗晾,我哋又認為utility係必須嘅。同一個邏輯,每人幾對鞋(有人唔止!),又大褸、又羽絨、又乾濕褸咁,要一個porch都好理所當然啫!就係咁,我哋屋企除咗個廚房唔使搞之外(因為上手剛剛整好,而且幾合心水),其他嘢全整,可謂係大project。

英國人好多嘢都DIY,不過我自問冇能力亦冇信心做得好。再加上要擴建,所以一定要搵幫手。咁究竟點樣搵裝修師傅呢?我哋喺英國唔係識好多人,又冇人介紹,自己對呢方面又毫無認識,咁惟有請Google大臣幫手啦!英國有好多網站提供tradesmen review,例如清潔服務、園藝、裝修、木工……等等。不過大家都應該知道唔同人對事物嘅睇法可以好唔同、好主觀。所以網上睇到嘅好評,只可以略作參考。我哋塭嘅第一個builder,就係透過呢D網站搵,結果咪就係分手收場囉!

#英國裝修 #吐第一滴血 #我家史上最大project


203 次瀏覽0 則留言

最新文章

查看全部