移民大作戰 (八 • 七) 之 裝修血淚史

隨住各個項目嘅延遲,油漆、電工、木工都各有問題兼神出鬼沒,靚仔嘅工作熱誠亦大幅減退,遲到早退越來越嚴重。我哋認為係時候表達我哋嘅憂慮,於是同佢坐低傾。目的係溝通,了解吓佢有咩問題,同時要佢清楚知道我哋嘅要求,同埋提醒佢要準時交貨。面對我哋嘅提問,靚仔似乎唔想認衰。佢話我哋因為成日text佢,令佢好大壓力,所以要多休息。咪住先,我哋點解要text佢呢?咪就係佢應承咗會做好,又或者會出現做嘢嘅人冇出現嘅時候囉!我哋好少直接打俾佢,因為都唔想騷擾佢。每次佢俾invoice我哋,我哋都會即日或翌日過數,從冇甩拖。問佢有乜問題,係唔係有困難,佢又話冇。咁我哋唯有俾D鼓勵,同埋再提醒佢應承咗我哋嘅交貨日期啦!呢類會面都發生過好幾次,每次都係發現佢又唔妥就會同佢傾。每次一開始佢都起晒槓,但傾完又善良晒。


去到七月尾嘅最後一個星期四,佢突然話想放一個星期假,有個family trip要去。佢話原本諗住covid冇得去,但係渡假地方嗰邊剛剛通知佢可以去喎。我哋心裡面即時無名火起,大佬呀,你未做好嘢就去風流快活,我哋又無啦啦浪費咗一星期喇!不過咁,其實佢都只係通知我哋,即使我哋幾唔高興,都阻唔到佢。我哋按捺住心中嘅怒火同不滿,仲要戥佢開心,不過跟手就問佢點樣追番工程進度。佢好似好有準備咁,話放假後會返埋星期六追進度,同埋佢放假期間,有兩日會有人嚟做批盪。我哋亦都攞咗嗰位師傅嘅電話,以便聯絡。

靚仔放假一星期,其實我哋可以趁機出去玩吓。但係佢實在太遲出聲,我哋根本安排唔切。加上週中會有人嚟做批盪,咁我哋就乖乖留喺屋企啦!結果,批盪先生no show。我哋等足一日,到下晝四點幾,send message俾批盪先生問佢係唔係會嚟做嘢。得到嘅回覆係 “Am I supposed to?”,佢話冇人confirm過佢,而且佢成個星期都唔得閒。我哋冇搵靚仔,因為於事無補。又或者我哋已習以為常,一D都唔驚訝。


#英國裝修 #吐第七滴血 #好地地唔得㗎

345 次瀏覽0 則留言

最新文章

查看全部