移民大作戰 (八 • 三) 之 裝修血淚史


移民大作戰 (八 • 三) 之 裝修血淚史


聖誕過後,佢哋慢慢埋番位做嘢。係呀,聖誕節係好緊要架,之前要準備心情,之後又要慢慢收拾心情。我哋一放完假就send email開始了解吓進度。唔好以為council睇完圖就會批,我哋仲需要喺門口當眼處貼出通告,通知街坊關於我哋嘅工程。佢哋係有權提出意見及反對,但一定要有合理原因。通告要張貼足一個月,之後council會考慮晒所有資料作出審批。


因為我哋想快D開始工程,所以planning permission都未有,我哋就交埋building regulation嘅申請。一般人都會等批咗planning先再遞building regulation申請,以免唔批會嘥咗個 package同埋申請費。睇到呢度,大家可能有少少𢯎頭。點解申請完planning又要申請building regulation呢?其實planning permission就係申請改建、擴建或改變用途,如果擬定建築冇違反法例,又冇人有合理原因反對,咁一般都會批准。至於building regulation就係要話俾council知,你嘅工程會點做去符合building regulation。Building control人員會喺不同階段嚟視察,確保建築符合法例同埋安全。到工程完結時,Building control會簽發滿意紙。將來要出售物業嘅時候就必須提供俾律師,所以係非常重要㗎!


我哋三爬兩撥就喺一月中交埋個building regulation申請,期望兩項申請可以差不多時間到手,然後快快開工。結果,兩項申請都如預期喺三月頭批出。狐狸先生話時間剛剛好,佢哋可以順住做,中間唔使停低等。佢哋喺二月尾開工,根據我哋嘅要求,第一部份係改建車房。因為做好之後,二寶就唔使日日爬樓梯啦!


狐狸先生同佢兩個伙記第一日好早到,朝早7:30已經拍門。呢度嘅builder一般都好早開工,當然亦好早收工。狐狸團隊每朝八點前到達,最晏試過五點先走,最早就點半前已經冇影。不過我哋唔介意佢哋嘅工時,最重要係佢哋可以如期交到貨啫。由於車房喺屋外,所以早期工程對生活影響不大。好不容易等到佢哋搞掂車房內櫳嘅隔熱同屋頂防漏。跟住就係扑牆打通車房同屋內,做成房間嘅入口。開窿當日,亦係我哋屋企同泥塵共存嘅開始。


我哋基本上每星期都會同狐狸開一次會講吓進度。通常佢都係講吓做成點,我哋會問佢下一步做乜。根據計劃,由於車房改成套房,要將污水渠接駁到公共污水渠。呢樣工程其實幾麻煩亦唔簡單,需要喺花園掘地行喉,途程唔短,而且仲要計埋斜度。不過狐狸先生成日同我哋講冇問題,仲話開完窿就接住掘花園。點知,說好了的「今個星期有挖泥機到場開工」就冇兌現。問狐狸先生,佢就話佢用開嗰間公司度緊期俾佢,未知幾時嚟開工。仲有,之前又講過會有人嚟度位做定條鐵做飯廳擴建嘅支撐,當然又冇出現啦!


由於狐狸先生同佢嘅伙記當中冇水電工,所以佢會負責搵其他人嚟協助呢部份嘅工程,並且負責協調。我哋喺上年入冬之後,開始發現個boiler有問題。成日停搞到冇暖氣又冇熱水,最慘係星期六日唔會有人理你,又冇相熟plumber。我哋已經試過好幾次要煲水沖涼,出動帶過嚟嘅充油式暖爐取暖。所以一開始裝修已經不斷同狐狸講要盡快換。佢搵咗個plumber嚟報價,我哋爽快決定,希望盡快換好,唔使再捱。可惜,唔知係狐狸失職,定係個plumber問題。講好咗邊日換,但到當日個爐又唔見,個plumber又冇影。


喺傾project期間,狐狸經常掛喺口邊話佢一定每日都會出現,而佢嘅團隊會日日開工,必要時佢自己都會落手落腳。係呀!講就永遠好容易,做嘅時候咪冇貨囉!狐狸有時係全日唔見人,咁都唔緊要,但佢嗰兩位伙記都可以突然全日no show,又冇人通知我哋!由於佢好多嘢都只講唔做 (恕我未能盡錄),而且越來越甩漏,越來越多隱瞞,我哋終於將我哋嘅問題同不滿email俾佢。其實我哋知道,好多問題佢係答唔到。平時問佢,佢就笑騎騎輕輕帶過。所以只有白紙黑字,佢先會正視,而且對我哋嚟講會有啲揸拿。


大家估吓佢點回應呢?


#英國裝修

#吐第三滴血

#狐狸尾巴

70 次瀏覽1 則留言

最新文章

查看全部