移民大作戰 (八• 九 ) 之 裝修血淚史後記

帖文嘅今天,我哋嘅裝修工程終於告一段落。由2019年10月開始,到2020年11月尾正式結束,前後用咗一年時間完成。當中用咗兩個builder,兩個plumber,三個電工。工程包括改建車房、擴建飯廳、加建書房、utility、porch、全屋翻新包括浴室。呢一年除咗要適應新生活,應付武肺,世界大變,仲要為裝修勞氣。我哋總算捱過裝修工程,亦都希望大家來年可以脱離2020年嘅困境。


我寫咁多嘢,唔係要數臭班builder同tradesman,而係希望諗住買舊屋裝修嘅朋友三思。英國有各式各樣嘅屋可以俾大家選擇,舊屋的確比較有character,而且多好多擴建嘅潛力,不過要整到合心水,就要勞心勞力兼洗一大筆。新屋通常係新發展區,可能環境比較荒蕪,同埋冇咁方便。呎價會貴D,即係同一size嘅new build會貴過舊屋。但係屋內配套比較新,可能唔使點整就可以入住。不過英國都有new build業主大聯盟,唔少人中伏,大家google吓就會有大量資訊。

無論你係決心做舊屋大翻新,定係做少量改善工程,都可以留意以下幾點。希望你哋唔好好似我哋行咁多冤枉路,浪費光陰,心力交瘁。


1. 切忌心急 呢度係英國唔係香港,請你唔好將香港人快靚正嘅哲學套落英國人身上。唔work㗎!而且你越心急越容易出錯,最終受害係你自己。


2. 做足功課 豬肉媽開始搞裝修前對呢樣嘢零認識,莫講話英國裝修,香港裝修都未識啦!喺乜都唔識嘅情況下,點樣表達到自己要求嘅同時又唔俾人呃?就係多做功課,起碼人哋講裝修用語,工具材料名你要識。呢樣嘢google大臣幫到你。


3. 了解建築法例 你都唔想起完個extension先發現唔合規格,又或者第日間屋賣唔出㗎!


4. 貨比三家 香港人最叻格價,唔使我多講。通常人都會搵最少三間格價,要記得講清楚要求,甚至可以白紙黑字整份invitation to tender俾佢哋報價。同你傾嘅時候,佢哋一定會話乜都做到 “everything is possible”,但到時就會呢樣唔得,嗰樣加錢。所以一定要先小人,後君子。


5. 問清楚全包宴用料 英國好多裝修工程都採取連工包料式報價。佢哋一般會俾款你揀,咁你都知佢哋唔會包靚料。例如潔具一定係普通貨色,如果你喺香港用開Toto,咁佢包嘅潔具你就一定唔會揀得落手。唔緊要,加錢自己買啦!咁咪超支囉!除非你係實用為主,要求唔高,否則連工包料未必適合你。如果你接受連工包料,都請你記住要問清楚包乜嘢,唔好到時先發現冇嘢揀得落手。


6. 每事問 好聽就叫做多溝通,其實係樣樣要經你同意,向你請示,等佢知你唔係流,唔好諗住瞞天過海。特別係額外添加嘅工作,簡單如鑽個窿,都要問佢幾多錢,唔好俾機會佢之後獅子開大口。


7. 白紙黑字 傾過嘅嘢必須寫低,俾個copy佢,等佢冇得反口。有人會堅持簽合約先開工,但其實佢份報價同埋來往email都足以證明有合約關係。工程中嘅任何改動,都必須紀錄,保障自己。


8. 不要猶豫 當你一發現有任何唔妥嘅地方就要即時出聲,否則佢哋會當你默許。例如佢遲到早退,你要俾佢知道你介意,不妨用你認為恰當嘅方法表達俾佢知。


9. 作最壞打算 壞人全世界都有,即使做足功課,都有機會遇上。記謹要認清自己嘅權益,諗定如果有爭拗、builder突然失縱、工程爛尾嘅時候可以點做。當你預先有盤算,就唔會咁易行錯棋。


10. 購買保險 要留意自己份家居保險包唔包裝修情況,如果唔包而你個builder又冇嘅話,你就要買咗先開工。


裝修從來都唔係簡單事,擴建就更加多嘢煩。不過我哋都冇後悔做咗呢個大project,因為我哋終於可以享受呢個合心水嘅安樂窩。


#英國裝修 #希望真係搞掂 #吐到貧血

421 次瀏覽0 則留言

最新文章

查看全部