移民大作戰 (八 • 二) 之 裝修血淚史


我哋嘅裝修血淚史係由上年八月先正式開始嘅。Land咗之後,豬肉媽就著手尋找builder。透過tradesmen review嘅網頁去搵,最正路當然係揾屋企附近嘅師傅,因為太遠佢哋都唔會接。網上見到其他人都係搵幾間做報價,然後再比較一下,於是豬肉媽又照版煮碗。我搵咗三間公司,睇過佢哋個網頁,又見D comment唔錯,就搵佢哋嚟傾。

第一間公司(飛機公司)嘅代表嚟到,我講俾佢知要整乜,佢不斷話冇問題。不過睇佢一身西裝骨骨嘅裝扮,就知道佢唔係落手落腳嗰位。佢睇完就話會email quotation俾我,如果OK就會再詳細傾。咁豬肉媽就耐心等候啦,不過等咗好耐(耐到唔記得幾耐都冇聲氣),打電話又冇人聽。咁即係佢哋自動放棄?唔緊要,不過佢嘥咗我時間囉!

第二個係以個人為單位,因為佢大大個嘜頭放喺個review page度。呢位獅子先生,當日準時好chill咁騎單車出現。佢話自己住附近,呢頭好多工程都係佢做,佢可以隨便敲個門都會搵到之前客仔做reference。聽落真係好勁囉,而且一路傾又一路有拋吓書包,問問題又問得似模似樣。點知後來佢自爆其實好耐冇工開,因為之前移民澳洲失敗,返嚟一缺不振。。。。。。一星期後我俾佢個報價嚇親!佢報咗一個可以喺Reading買一間兩房屋嘅價錢俾我!哈哈!

第三位係狐狸先生,佢當日準時嚟到,而且禮貌周周。佢一路聽我講想整D乜,一路俾意見,而且每個意見都似乎係度晒位兼望清楚D地方先講。一副從容不逼、用心聆聽、顧客至上嘅模樣。狐狸先生大約一星期後就俾咗報價我哋,價錢唔算平,但亦唔係不著邊際。來回同佢傾咗幾次,中間修改過一D部份。而同時間就等飛機公司同埋獅子先生嘅報價,不過飛機公司就最終唔見影,而獅子先生就因開咗大口而唔會揀。

我哋由八月開始搵,傾吓等吓,攪到十一月都未開工。每日對住間屋,無數嘅紙箱,冇乜傢俬嘅空間,冇衣櫃擺衫,冇鞋櫃擺鞋,同埋每晚貼地瞓墊褥……唉!好想快D開始裝修兼快D搞掂呀!就係因為我哋心急,所以都冇再搵其他人報價,就搵咗狐狸先生幫我哋裝修。佢報價係連工包料,喺英國好多都係咁做,不過我哋之後覺得唔太好。因為料嘅價錢都可以分好多級數,佢就當然話自己包中價啦!

大家仲記唔記得我哋計劃整D乜嘢呢?上一篇提過,我哋想將車房改成套房,擴建飯廳,加建utility,加建front porch,同埋內櫳裝修。狐狸先生一路都話應該唔使申請planning permission,只要擴建唔超過幾多幾多就得喇。正所謂人生路不熟,既然搵得佢,本住「用人勿疑」嘅態度,就信佢啦!

正當傾到差不多可以開工之時,狐狸先生又突然話都係搵architect或者structural engineer睇睇好D。在於我哋立場,就梗係希望確定工程係可行同埋合法先開始啦!於是狐狸先生又介紹咗則師先生嚟睇,跟手畫圖。呢D費用當然少不免,而且則師先生都俾咗唔少專業意見我哋。接受咗佢部份意見之後,我哋嘅擴建部份就比原先計劃嘅大咗,不過實用好多。由於擴建部分唔少,又要打地基,又要行污水渠,所以申請planning permission係無可避免。

搞到呢度已經臨近聖誕,我哋嘅主要工程仍然未能開展。只係趕得切聖誕前入紙申請planning permission,同埋狐狸先生趁呢段時間幫我喺loft裝咗板,咁我哋就可以將部分紙箱家當放上去。咁樣先唔使對住紙箱食聖誕大餐咋!

(圖:上年同次郎做嘅聖誕老人,重點在後面嘅紙箱)

#英國裝修 #吐第二滴血 #你急佢唔急

96 次瀏覽0 則留言

最新文章

查看全部