移民大作戰 (八 • 五) 之 裝修血淚史



炒咗隻狐狸,我哋就要再揾另一個builder。即係之前做過嘅嘢,要由頭再做過。冇辦法啦,於是我哋又上網搵,今次搵夠四間。由於疫情加上lock down關係,我哋都好擔心冇人睬我哋。出乎意料,四間都有反應。因為之前已經同狐狸開咗n次會,又申請晒planning permission,所以今次目標明確。


四個builder都可謂各有特式,有老有嫩,規模有大有細。四個當中有一個因為lock down,所以唔嚟實地報價,只根據我哋嘅文字描述去報價。呢位仔細先生個quotation好詳細列出所有工時及價錢,非常清析。不過未上門睇都已經見到價錢唔平,兼且佢唔敢應承幾時開工,所以我哋冇揀佢。


第二位係大隻講先生,佢嚟報價當日非常健談,仲話聽完我哋嘅遭遇就知之前個builder係拖工程。臨走前佢話weekend前可以俾報價我哋,如果OK就下星期可以開工。結果大隻講去如黃鶴,毫無消息,自動棄權。


第三位係和善版嘅Jeremy Clarkson(即係不獲續約嗰位Top Gear主持),當日佢揸住架靚車嚟報價,好有大老板feel。佢話佢哋係大公司,有好多夥記,有好多材料,隨時可以開工。前排先喺Windsor做咗單£300,000嘅工程,個屋主非常滿意。如果我哋接受報價,下星期可以開工㗎喇!聽佢咁講,我哋就估計佢會收得好貴,點知收到quotation又覺得價錢正常,只係佢個報價非常簡陋,完全冇寫細項,得幾個大數,令我哋有D擔心。


最後一位係最年輕嘅一位。見面當日,我哋一開門就以為佢搵錯地方。因為出現喺我哋眼前嘅係一位廿零三十歲,身型高佻兼非常俊朗嘅男士。老實講,佢似去A&F做model多D。佢依足規矩,戴住口罩同埋膠手套,不過就兩手揈揈。如果唔係我哋準備好份invitation to tender 俾佢,佢個報價應該會漏咗好多嘢(普遍年輕人弊病!)靚仔話自己做咗呢行18年,最擅長砌磚起屋。不過佢團隊只有三個人,唔可以做得好快,亦因為咁,佢哋每次只可以接一單工程。佢當時手上嘅工程會喺四星期內完成,即係話佢四星期後先可以開工。靚仔嘅報價係最平,不過佢係唔包用料嘅,只係包咗建築材料,例如磚、水泥沙石。其他如油漆、窗、門、潔具一概要自己提供。其實呢樣嘢真係見仁見智,包晒就唔使煩,不過就有機會唔係自己心水用料,又或者要加錢先會有好嘢,咁張單最終就好難控制。


講到呢度,大家又會揀邊位呢?其實我哋都只可以從Jeremy Clarkson同靚仔之間擇其一。我自己就偏向Jeremy Clarkson,而豬肉爸就偏向靚仔。(我係唔會被美色迷惑㗎!)豬肉爸認為靚仔年輕,應該會對自己嘅錢途同聲譽比較著緊。而且佢比我哋後生,可能冇咁狡猾。既然豬肉爸有睇法,咁我就梗係跟啦!就係咁,我哋就揀咗靚仔,於是工程就喺四月尾再開始。


#英國裝修 #吐第五滴血 #唔打得都睇得

84 次瀏覽0 則留言

最新文章

查看全部