移民大作戰 (八 • 八) 之 裝修血淚史

靚仔返嚟之後,我哋隻字不提批盪師傅冇嚟。佢自己心知肚明,如果唔係,佢見到幅牆未做批盪,點會問都唔問?我哋已經乏力兼費事嘥氣,只係希望快快搞掂工程,唔想再見到有builder喺我屋企出現。


原本希望佢放完假返嚟,生生性性全速前進。可惜事與願違,靚仔工作仍然散慢,三點前已經帶住golf袋靜靜雞收工。油漆先生仍然嚟吓又甩吓底,電工又亂咁報價,木工又做失蹤人口。我哋每星期都會問靚仔工程進度如何,佢每次都話會如期完成。靚仔喺佢份quotation度,白紙黑字寫明9月18號完工。日子逐漸迫近,連盲嘅都知,以當時進度絕對冇可能如期完成。


於是我哋喺死線前一星期問佢,係唔係要延遲呀?應該點都趕唔切啦!然後佢話要多兩星期,因為阿邊個會嚟做呢樣,阿嗰個會嚟做嗰樣……相信大家都估到,阿邊個同阿嗰個一係就no show,一係就做唔切啦!於是過咗兩星期,我哋就捉住佢,逐個項目問佢攞完工日期。根據佢提供嘅日子寫低,成個project包埋執漏,佢話會喺11月尾完成,大家簽名作實。靚仔當時冇異議,因為新嘅日子全部係佢定(其實9月18號都係佢定),簽好之後就繼續工程,我哋亦多次重新,如果有任何問題或阻滯就要即時同我哋傾,靚仔都一一答應。



唔知係唔係誤信讒言,覺得自己簽咗嘢就蝕咗章,佢當晚八點幾send咗invoice嚟,要收我七千幾磅,話係後加嘅工作,仲要即時俾錢。張單包括咗一D quotation已有嘅項目,即係大數已經包咗嘅工作。最離譜嘅係佢收我哋£75去提取一度房門,£200因為我哋掉咗一D紙皮落垃圾斗(skip),同埋一D佢offer幫我哋做嘅鑽窿砌櫃。好!咁即係玩嘢啦!冇問題,雖然我哋非常憤怒,但係事情點都應該理性解決。於是我哋要求所有數字break down,解釋點樣計出嚟,同埋問佢點解唔報價就開工做呢D所謂額外嘅工作。我哋仲擔心佢唔記得,forward番佢4月俾我哋嘅email,內容係佢confirm所有quotation以外工程都會先提供報價,我哋接受, 佢先會開工。 出完招之後,我哋當然要保障自己,同埋作最壞打算,因為佢隨時發爛渣走咗去。於是我哋上Citizens Advice網頁,file咗個complain。將來龍去脈寫低,順道攞一D advice。


到第二朝,佢照常出現,按照劇情黑面。喺我哋最忙碌侍奉緊對仔食早餐兼送返學嘅時候,佢話要同我哋傾。佢問我哋有邊條數唔滿意,有邊樣嘢覺得做得唔靚所以唔俾錢。睇嚟佢都唔係好明事理。送完返學之後同佢傾,佢叫埋佢老豆參與。佢老豆係一位網球教練,平時都會出現,不過唔識做工程,只會幫手執頭執尾收垃圾。我哋都係開咗工先知,佢所謂嘅三人團隊,其中一個係佢老豆,另一位係佢妹夫,同樣係外行人。佢老豆在場係好事,即使佢幫住個仔,都總算有多個人當面聽住。


整個會面都充滿火藥味,每當佢答唔到我哋,佢就會話 ”Why you always have all the cards?”。我哋都唔客氣提醒佢,我哋其實係你老板,呢間係我哋family house,我哋對呢個project放咗好多心血。但你作為project manager,乜嘢都安排唔到。油漆、電工、批盪失蹤,你不但冇處理,仲同佢哋一齊失蹤。每始承諾會交貨嘅嘢都交唔到,仲要每日遲到早退 (quotation寫咗每日0730開工1730收工,實情係0900開工,1500前收工)。之前從來冇講過要收錢嘅嘢,突然間又話要收,價錢仲要任你噏。一句到尾,11月底一定要完成所有工程,一日未見滿意紙,我哋一毫子尾數都唔會俾。至於嗰張額外嘅invoice,請你提供break down同計法,如果合理嘅話,我哋會即刻找數。聽完之後,靚仔竟然回應我哋話佢日日嚟開工冇時間做paper work(咁你又有時間整invoice?)然後我哋即刻問,咁你要幾多時間吖?佢話要三個鐘!好,你宜家即刻做啦!講完之後,佢哋都冇嘢講,繼續黑面返埋位工作。


跟住點?依照人物性格就梗係又求其交幾粒數,減吓價,仍然冇break down同計法啦!其實大家都知佢唔會俾到。一星期後,佢按耐不住問我哋咩銀碼我哋先接受。由於時間關係,我哋一早已經計好,佢亦冇意見,照單全收。跟住佢就問我哋想幾時搬洗衣機(係之前講好咗會做嘅),見過鬼怕黑就梗係即刻問佢要幾錢啦!跟住佢話唔使,佢唔想大家關係咁差,佢會好好完成餘下工程。哦……咁好啦!見佢面容稍為放鬆,仲面帶微笑,我哋於是出動坦誠tone問佢:你之前發生咩事呀?剛開project時你好有衝勁,做得好快㗎,點解會咁呢?然後佢面帶無耐話 “I don’t know……”我哋無語,跟住佢話會好好完成工程,叫我哋放心。


自此以後,靚仔每朝0730到達,雖然唔係1730先收工,但睇住每日有進展,佢又同我哋多咗溝通,總算(老懷)安慰。

#英國裝修 #終於吐完血 #天下烏鴉 #白紙黑字的重要性

309 次瀏覽0 則留言

最新文章

查看全部