移民大作戰 (八 • 四) 之 裝修血淚史

上回講到,我哋終於忍唔住,要寫情信俾狐狸。作為一隻狐狸,佢當然即時詐傻扮懵啦!佢email回覆話有溝通上嘅誤會,要坐低傾吓。好!最好傾清楚,我哋當然要俾機會佢解釋啦!星期一早上佢準時出現,不過對於我哋嘅提問,佢完全解釋唔到。最荒謬係佢話一直諗住5月1號先開工!一聽到呢句,我哋真係火都嚟埋。問佢幾時講過,佢支吾以對;我哋問佢咁點解當初承諾個garage會三月底完成?點解應承我哋會日日有人開工,但係又可以成個禮拜唔見人?喺答唔到嘅情況下,狐狸終於承認佢其實有接其他工程,對於我哋嘅delay,佢只可以表示抱歉。

與其繼續嘥時間,不如盡快搞掂件事。於是我哋要求佢盡快復工,完成開展咗而又未完成嘅項目,包括換boiler、裝好garage個窗門……等等。會面完畢前,狐狸實牙實齒話會盡快搞掂個garage,當然我哋都係採取觀望態度。不出所料,星期二都係唔見人,只係email話訂咗嘅料未有(其實佢晨早已經話訂咗),話星期五會有,然後會即刻嚟開工。到星期三,佢就再email嚟話lock down期間繼續工程係犯法,所以暫時唔可以開工,等到有新消息再算(不過當時政府其實有清楚講過所有construction works係可以繼續)。嚟到呢一刻,真係要爆喇!我哋諗過度過,都覺得係時候止蝕。於是email俾狐狸,正式炒佢魷魚!

同隻狐狸分手,我哋已經預咗佢會敲詐。我哋底線係,做咗嘅工程,一定會找數。未完成嘅,就按比例俾錢。狐狸當然突然變獅子開大口啦!經過來回幾轉之後,最終張單斬咗一半。荷包雖然冇咁傷,但係浪費咗嘅時間、心機,同埋死咗嘅細胞就真係點都補唔番。然後諗到要由頭搵過一個builder、又要再勞氣、又可能再俾人呃……唉!

搞擴建同埋裝修工程,的確係我哋嚟到英國之後最大嘅挫折!

#英國裝修 #吐第四滴血 #煩到一個點


91 次瀏覽0 則留言

最新文章

查看全部