究竟有冇後悔?

小朋友來咗英國差不多半年,開學亦一個星期有多,當中經歷過同媽媽分隔異地同封城嘅日子,難捱嘅日子總算過去了。雖然近期英國疫情又再次轉壞,防疫措施亦再一次收緊,不過起碼而家我哋已經一家團聚。


我哋晚飯同小朋友傾計嘅時候,問下佢校園生活,傾下佢嚟咗咁耐又返咗成個禮拜學慣唔慣,有無後悔當初答應過嚟英國?佢好快好堅決咁話完全無後悔。佢話因為呢度地方大啲,學校同老師俾佢嘅自由度更加大,上堂可以討論嘅時間多咗,學嘅嘢又更有趣同埋更生活化,老師更加多關懷,體育堂又好玩啲,仲有就係可以好開心咁踢多啲波。


小朋友響香港嘅時候就讀嘅學校同英國呢間個課程大同小異,所以銜接適應就冇乜問題。C爸C媽眼見小朋友響呢度又真係好鐘意返學,放學見到佢問佢點解,佢每次都係答行貨,唔係話同學好玩就係地方大,總之就係好玩啦!我哋覺得其實都可能因為佢太耐無返學,所以一有得返就覺得特別開心。其實C爸C媽見到小朋友大致適應都無問題,每日愉快上學,放學返屋企都係笑容滿面,無論學校定係外面足球隊都已經揾到朋友知己,我哋已經好感恩。


當然我哋同小朋友都會掛住響香港嘅親友和事物,當然仲有美食啦,畢竟我哋都係喺香港長大加上揾錢就一定係響香港揾得多啲啦。但係人生有時就係要有取捨,冇得乜都贏哂,呢一刻我會選擇自由同埋出街唔會受到不必要嘅威脅欺凌!


眼見短短大半年香港嘅轉變,尤其呢一個月發生嘅事,沒有最荒謬,只有更荒謬,加上見到小朋友而家嘅生活充滿選擇同自主,又點會後悔呢?



#純個人感受

#不喜勿插

#人生充滿選擇

#移民係人生大事

#亦都係一家人嘅事

#有好多持份者

#慎重考慮

#C媽

#C爸

46 次瀏覽0 則留言

最新文章

查看全部