給十五/十六的你

呢兩日收到唔少朋友嘅message,發現有唔少15/16嘅朋友,其實喺各方面都幾難入手,亦有朋友問點解我會由最初嘅Surrey變做現在嘅Berkshire, Reading。


講真,我唔敢講自己揀啱了,因為我嚟咗呢邊都畢竟只係 6 個星期貨仔。但係我就好想鼓勵大家同屋企人做個exercise,解構下心裡面嘅自己究竟諗緊啲咩。我唔理你想幾時走,同屋企人sync到其實最緊要。



我嘗試整一個表,裡面每一個細項都好值得問吓自己。我嘗試用呢個圖解釋番俾大家聽,我喺考慮地點嘅過程中,所「秤」過嘅因素,亦有助大家沉澱一吓自己嘅想法。


戴番個頭盔先,我冇住過哂兩個地方,所以唔係用家分享,大家可以當係考慮歷程,裡面嘅內容可能都係好主觀嘅。我只想提供考慮方向供大家參考。


(1)工作機會 V 小朋友讀書


我會將兩者放到最高,亦都係好近嘅位置。我唔知大家會唔會搵到工先過嚟,定係裸移過嚟,好似我咁。如果仍要工作嘅打工仔,我唔係好建議住得太偏遠。我而家住嘅地方係較為近London嘅,喺搵工方面,可以搵埋London嘅工,鐵路沿線嘅地方亦可以考慮。


而喺學校方面,我呢邊嘅小學都幾多,好嘅小學亦都唔少;呢個都重要,要想像一個大人返工,另一個照顧者接送放學嘅安排會係點,會唔會冇哂個人生活(如果照顧者唔識揸車);此外,大家亦要喺揀屋嘅時候了解埋英國嘅校網嘅Catchment (如果係適齢入學)。


(2)生活環境 V 生活指數


初頭揀Surrey,係因為Surrey嘅學校都係幾唔錯嘅,所以一向都受家長歡迎;而Surrey 位於London嘅西南部;因此樓價都屬於貴貴地嗰種,特別係好學校附近嘅屋,啱我Budget嘅屋,感覺有點舊並且也不便宜,住Surrey就好似100%為咗個仔咁,我嘅感覺係個決定有點失衡。

如果Same budget, 放喺Reading, 屋,質數好似比較好啲(始終不是London);同埋,我諗我哋啲湊住個細嘅,都好需要住喺family friendly嘅環境。我都幾Like Reading,係一個好family friendly嘅地方,有好多公園,大草地,行開行埋都會見到一家大細嘅,感覺舒服。


我都幾怕靜,同埋大人喺起居上會被困住喺間屋度,所以我揀嘅區都係行到去超市嘅,15分鐘左右,亦有大商場,呢個純粹係個人一個覺得重要嘅因素。社區感較濃嘅地方,可能會較啱愛熱鬧嘅港人。


兩個地方嘅生活指數都較高,冇辦法,針冇兩頭利;大家睇rightmove (搵樓網),大概已經可以知道各地租金指數。當然,一個地方,唔同區域,樓價都可能會差 1-2成。


(3)支援網絡


呢一點我都幾想分享。話說小丐B嚟到英國,性情大變,由一個乖寶寶變為一個脾氣仔,冇辦法,Lock down又新環境,大人小朋友都難以適應。我同窮花打呢段時間臉上已經有過幾次指甲痕。


因此,有熟朋友好緊要。大人細路可以distancing一下、抖下氣,有其他家庭嘅support好緊要。


如果一個地方生活指數低好多,卻係冇支援網絡嘅,我覺得可以考慮放棄;支援網絡呢個對初到埗英國又人生路不熟嘅時間,至為重要。寧願頭幾年生活指數貴少少。


(4)感覺


Last but not least, 感覺從來都係重要。


我敢講,無論你做幾多資料搜集,都係難以完全了解成個地方。好怕做錯決定嘅話,咪租住樓先囉,唔一定要買樓㗎。香港人成日都要有層樓揸手先有安全感,呢個我明。


不過,隔山買牛,始終有一定嘅難度同埋風險。與其寸步難行,不如放過自己,感覺對就勇敢行過去。住得唔好嘅,咪租過第二度囉!生活方式可以好flexible嘅!


總括而言,絕對係一個取捨嘅過程,絕對需要時間問問你嘅心。


唔好人話好就中個頭去,睇多啲料,唔好照單全收,自己要再分析㗎。


*********************************************

如有任何移英等問題,歡迎留言或PM,媽打答到都盡做!

Facebook:https://www.facebook.com/HKmotherfighter2UK

港英匯館網誌:https://www.hongkongers.co.uk/profile/hkmfighter2uk/

新Channel努力開墾中,支持我嘅記得subscribe跟手開埋個鐘仔。鍾意片嘅內容就要Like同埋Share喇! https://bit.ly/2WSusjj

*^U^)人(≧V≦*)/ 支持窮媽打,歡迎網上請佢飲杯咖啡:https://www.buymeacoffee.com/HKmotherfighter

*********************************************

#BNO #LOTR #末代港英窮媽打 #英國 #香港人 #移民英國 #Berkshire #移英 #BNOVisa #英國生活 #Reading #雷丁

401 次瀏覽0 則留言

最新文章

查看全部