英國學車究極挑戰



上回講到,某某人忽然之間筆試合格,其實我一心諗住佢起碼考 10 次先得,點知俾佢好彩啱啱合格,所以要搵教車師傅俾佢 (其實未考到筆試都可以搵教車師傅學住先)。

根據對上一次封市嘅經驗,教車師傅啲堂通常頭兩個月都會滿晒,點知到今次一問就大 L 鑊。

我呢條村仔大部份嘅教車師傅都話 !!!!未來一年!!!!都唔會有任何空閒去接受新學生。的確如果嗰條村有一間中學嘅話,每年夠年齡去學車嘅新學生冇100都有幾十。而我呢條村好似有 2 間.......





英國有車牌,同你喺香港嘅高樓大廈住有幾多部電梯一樣,如果成幢樓得一部電梯你咪等吓先囉,部電梯每日係咁行壞咗都唔知點算好,如果有兩部電梯就唔同,繁忙時候都可以分流下,一部壞咗第二部都可以頂住先。唔好同我講你係住 House 或者唐樓,淨係可以行樓梯。。。。。

好啦,我嚟到英國咁耐,第一次覺得有真實嘅挑戰嚟到喇!!

係英國想考取駕駛執照,其實並無要求一定要經合資格嘅教車師傅教你先可以去考試。事實上,當你地過嚟攞到學牌之後,係可以搵朋友監察住你嘅情況之下去練車。 當然呢個朋友係有一啲特定嘅要求啦

1. 年滿21歲以上

2. 要擁有三年或以上嘅正式車牌 (full driving licence)

3. 你學棍波佢一定要有三年+嘅棍波牌

4. 你揸個架車一定要買到 learner driver 保險 (九成係用呢個朋友架車, 通常就會喺朋友本身嘅汽車保險上面加你個名上去 $$$$$$,如果撞咗要 Claim 保險嘅話,呢個朋友出年嘅保費就多得你唔少啦)

5. 乘客位置最少安裝多一片倒後鏡,係俾你個朋友睇

6. 朋友喺監督你練車嘅時候絕對不能用手機,這是犯法的

7. 你坐入司機位之前記得痴返個L牌喺車頭同埋車尾 (喺威爾斯要痴返個 D 牌)

8. 除非你呢個朋友已經係合資格嘅教車師傅,否則一定只可以係 Free Help

https://www.gov.uk/driving-lessons-learning-to-drive/practising-with-family-or-friends

睇到呢度相信大家都明白我嘅挑戰係乜...大家嘅英國朋友圈裏面都唔難搵到一個咁嘅人,最煩就係點樣先用教得識你。

識揸車唔代表識教車,我亦遇過一啲唔識教車嘅合格教車師傅,對於如何分別一個教車師傅係好定係唔好就遲啲出post再講。

因為咁,我特登上官網參考返如何成為一個合格的教車師傅,我只不過係考筆試同埋路試s。

https://www.gov.uk/become-car-driving-instructor

英國政府不嬲都好支持市民考取專業資格,所以好正規咁出版左幾本字典噤口嘅書俾你讀。你睇吓頭呢幾本夾埋只有 7.5 cm 厚,仲未計隻DVD同埋未寄到黎嘅書。


另外英國唔同嘅機構都會有教車師傅班,可以俾你貨金上堂。教車師傅班有冇用過真係唔知,但係我知道考到嘅話真係長做長有。

你哋喺香港一定等唔切考到車牌先過嚟㗎啦,你哋過嚟首先要考車,喺香港冇興趣學車嘅你過到嚟被迫學車,唔通個個都學 20 個鐘頭就可以去考試?你哋嘅子女好快就會成年又可以考車,佢哋成年之後好快就會生仔跟住之後好快又成年又可以考車。

住喺大城市又已經識揸車嘅你可以考慮吓呢個生活方案

真係唔好意思呀我啲post嘅文字太長,但係我覺得如果拍條片出嚟嘅話會更長

#prefercountryside

#英國學車

888 次瀏覽0 則留言

最新文章

查看全部