英國照廢一日遊(英國照肺人士仍然適用 )

#英國照廢一日遊 #英國申請未在香港照肺人士仍然適用 今朝朋友傳嚟香港照完肺,如果個report仲valid可以唔使再照肺嘅消息,對於剛剛出咗城照肺嘅窮媽打來說可算是晴天pig pig,除咗時間、金錢嘅損失,仲輸咗一餐飯俾同行嘅朋友 (因為佢話佢直覺係會修改)。除咗同double照肺嘅你講聲恭喜之外,我都唔知講咩好。(強笑中)


以下資料俾未照肺嘅你。如果你冇double照肺,方便嘅話俾個emoji 同情吓窮媽打一家嘅遭遇。(罐頭笑聲)


講正經,我哋去咗倫敦 Visa Medicals照肺,係book車去火車返的。如果想安心出行(唔好打的用呢個term),book車絕對係一個安全嘅選擇。小朋友未過12歲,就要額外request car seat喇,唔需要額外加錢嘅。


1 - 唔好早,唔好遲,時間啱啱好


診所叫我哋唔好早,因為佢係一出一入嘅制度嘅,所以唔會早放你上去。結果係,早10分鐘按佢嘅鐘仔想佢開門,結果都係唔放行,認真守時的。


2 - 珍惜你所見到嘅洗手間


Lock down期間,全條街幾乎也是死城一樣。而連帶了所有洗手間都未必會開放,有細路同女士就要注意,你所見到嘅洗手間,可能係你短期內最後見到嘅一個洗手間。

3 - 醫生的一席話

一家見醫生。感覺上,佢check得較香港嘅聯合醫務認真。度高磅重全部都係入到去先做,之後就去照X-Ray喇 (比較有趣嘅,係佢哋幫手照X-ray嘅阿姨係冇避X-Ray,照喺間房度陪你嘅,西方人真係比較型的)


醫生見我哋山長水又遠由Berkshire嚟,就問我哋點解要咁做。我哋話,因為Berkshire嗰間Clinic唔覆e-mail,直至那刻都係完全冇覆過;而佢哋間clinic係有真人接聽同埋最Responsive。醫生於是話:


「如果真係咁嘅情況,你哋真係要同Home Office反映你哋嘅意見。如果唔係佢哋係唔會知道,真係要講。」


體現了何等樣嘅爭取權益生活取態。我覺得,學到嘢!

(原來自己某程度上面折服咗喺體制下而不自知,有甚麼係deserve,有甚麼是啞忍咗?)


4 - 白色底底啊唔該


呢個真係人都癲。因為小丐B有啲退咗學、著住校服嘅粉藍底底學生相未銷,因此想快快脆脆用埋佢。殊不知,交相之際,佢哋Reject咗張相,問我有冇帶幫佢帶白底嘅證件相⋯⋯ 我其實有幫阿仔影定白底嘅證件相嚟英國,只是,放哂喺屋企。


可能大家都覺得係常識。我係應該一早知道,只可惜,香港間聯合醫務太「好人」,嗰時有收咗我張粉藍底底相,而冇話有問題。


本身,喺倫敦影證件相一啲都冇難度。難度所在,係而家Lock down咗,你都唔知邊度開邊度唔開。


之後,我哋用人類史上最偉大嘅發明之一----- Google去check "Passport Photo", 問問大神邊度有得影證件相嘅app, 佢俾到個資料,行20分鐘左右,係有嘅⋯⋯於是,我哋就用最強嘅步速前往目的地嘞。而最後,間店係⋯⋯ ‧ ‧ ‧ ‧ ‧ 有開嘅!!!


有驚無險,即影即有,誠惠15磅,6張。(幾錢都要俾㗎啦!)



呢間小店感覺好似網吧咁,有好多服務提供,Fax、影印、Shipment、郵箱服務等All In One係一個印度後生仔主理的。因為成間店都有啲辦館feel,佢一路print張相,我心裡一直祈禱,要Print到啊,唔好冇墨啊,唔好壞機啊⋯⋯


見到部Printer嘔到張相紙,然後印度少年喺度切相嘅時候,心情終於可以放輕鬆了。

老媽燒鬚,感恩,甩轆過後,全身而回!


******************************************** Be Water, MeWe請follow: https://mewe.com/p/末代港英窮媽打

港英匯館網誌: https://www.hongkongers.co.uk/profile/hkmfighter2uk/

Youtube Channel,支持我嘅記得subscribe跟手開埋個鐘仔。鍾意片嘅內容就要Like同埋Share喇! https://bit.ly/2WSusjj

Facebook: https://www.facebook.com/HKmotherfighter2UK

*^U^)人(≧V≦*)/

支持窮媽打,歡迎網上請佢飲杯咖啡: https://www.buymeacoffee.com/HKmotherfighter

*********************************************

#BNO #LOTR #末代港英窮媽打 #英國 #香港人 #移民英國 #Berkshire #移英 #BNOVisa #英國生活 #Reading #雷丁

162 次瀏覽0 則留言

最新文章

查看全部