英國的夏天真好

藍天白雲坐喺個草地發呆真係幾舒服, 不過今日並唔係講呢個話題。 我哋今日嘅話題比較嚴肅, 會同大家嘅生命健康有影響。 !!膽小唔敢睇核突野嘅請離開!!





天氣回暖, 陽光充足, 後花園啲草得生得特別茂盛, 前日剪完今日望無返出去就已經又長又亂。 夏天除咗植物之外, 係英國生長得最快速嘅我相信都係烏蠅。 佢哋好似幫你打氣咁樣,最鍾意喺煮飯嘅時候出現(夠膽你就炒蜆)。 如果有最開我嘅朋友都依稀記得, 我上網買過四隻烏蠅捕捉器。呢個烏蠅捕捉器 其實係一個黃色水樽, 最頂有個開口俾啲烏蠅自己飛入。

本以為成樽豆豉滿晒就可以減低烏蠅係煮飯時嘅入侵? 咁你就錯啦, 佢哋係不斷唔知係邊度飛入嚟, 我試過閂晒所有門窗煮飯都可以有烏蠅出現。 所以我就諗緊會唔會係間屋入邊有個烏蠅竇? 我咁諗係有原因嘅, 下面張相真係放咗出嚟大約五個鐘就收集到咁多烏蠅, 仲要每隻都又肥又黑。




其實而家呢個廚房嘅格局非常之靚, 一大塊玻璃望住個後花園, 而後花園後面又見唔到鄰居。 點知係尋晚我哋發現到一樣好恐怖嘅事, 促使我哋三更半夜喺度洗廚房。。。。

你睇吓張相入邊, 由於夏天日長夜短,我哋等到好夜出面個天先黑小小, 正因為呢 個黑色嘅背景, 先可以令到我哋忽然之間發現到嗰塊玻璃上面有一炸白色點點。 正確啲來講係一抽白色點點。




由於事出突然, 我都唔得閒攞部電話出嚟影相, 就等我簡單介紹嗰一抽白色點點。 呢抽白色點點 癡住咗喺玻璃上方, 一個唔係好留意到嘅位置。 一開始我都以為係煮嘢食嗰陣時彈上去嘅污跡, 但係行近啲睇清楚, 見到嗰啲一點點開始呈現立體嘅圓形模式, 冇錯, 我深信呢一"劈"野 絕對係烏蠅卵。


清理左呢一劈烏蠅卵之後, 當然要清理埋塊玻璃附近嘅範圍。 唔睇由自可, 我發覺呢啲卵原來好平均地佈滿左成塊玻璃。 由於佢哋分散一粒一粒咁佈滿成塊玻璃, 就咁睇好難發現。 我用清潔劑浸一陣都唔甩, 結果要用百潔布卒先得。 唔怪得塊玻璃成日有咁多烏蠅鍾意黐住上去啦, 原來呢度係佢哋嘅大產房.........................


清理過後嘅第二日, 啲大烏蠅如常出現, 但係細烏蠅嘅數量就冇咗好多。。。。。。


所以記得, 夏天要將所有杯杯碟碟刀刀叉叉鑊鏟煮食用具全部擺晒入櫃桶裏面!!!! 除非你好需要添加營養豐富嘅蛋白質


唔通真係住喺鄉村先會有呢個問題? 有朋友話佢煮飯嗰陣時完全沒有烏蠅出現, 重點係佢全屋啲門窗完全緊閉, 係冇冷氣同埋油煙密佈嘅情況之下真係唔知佢點樣煮過餐飯。


#prefercountryside

#勁多烏蠅

178 次瀏覽0 則留言

最新文章

查看全部