記那個LOTR到埗的早上

嚟咗英國一個月喇,港、英疫情、防疫措施變幻莫測,上星期英國呢入邊慶幸仲有得出街食嘢嘅時候,呢一個星期英國呢邊已經封咗城。


一直都欠大家一篇LOTR入境文,的起心肝唔追劇住,唔知道呢個時候大家仲用唔用得着,但我好希望有一日大家會用得着。


窮媽打一家三口係喺11月尾走,本來以為機場會戒嚴限送機,點知卻能夠自出自入,所以都好感恩可以同親戚朋友喺閘口好好說再見。


有少少枝節係,我哋係搭BA嘅,每個喼有限定重量呢個大家知啦,我哋就大安旨意諗住補錢了事,原來每個篋重量係有ceiling, 係英國嘅勞工法例保障工人嘅,每個篋唔能夠重過32kg,所以check-in嘅時候玩咗一陣磅重同搬篋,為緊張嘅行程再加幾分緊張。


香港過關呢一part唔講喇,反而係飛機上面我哋就係用咗大量嘅酒精噴霧。介紹大家可以去日本城度買,每支100ml攞到盡,(航空條例規定可以有10支跟身),有小朋友更加需要。我哋成程機噴咗大半支,基本上去廁所返座位,食嘢前後都好需要。


13鐘頭嘅直航機,一路提心吊膽住,一邊怕阿仔扭計,另外一邊廂,我覺得都係因為心裏面充滿住忐忑,會唔會俾人彈鐘或者留咗啲乜嘢,覺得整件事好多不穩定因素存在。


落機,拖住個仔根本唔使諗可以行得快,又要拎車仔及拎床仔(BA可以有一件可摺疊式BB床行李 baby cot),只能夠龜速咁樣去關口。


入境嘅時候,之前有好多師兄師姐話可以排 UK citizen 隊,條隊好快。我想講我嗰日全村香港人係只能夠排non UK citizen,而條隊亦都十分之長,可以話係似大節日羅湖啲關咁,個個都一家大細,一抽二能,都幾狼狽。好在亞仔竟然自動瞓着咗,如果唔係,佢一扭計,我哋兩個大人已經成手行李,其實係會搞唔掂。


去到我哋喇,我哋其實已經預備左一個book folder(都係跟網上搵嘅懶人包去執嘅),希望可以好快拎得出關員要嘅文件。


女關員第一下叫我哋除口罩講嘢,即刻O咗嘴(當時其實所有關員都係唔戴口罩嘅),咁佢要除都要除㗎,後來佢講係因為佢係弱聽,我真係除咗口罩佢先會知我哋講乜。


我哋同佢講我哋嚟英國嘅原因係Leave Outside the Rules (啲人話唔好講簡寫LOTR,有記住的)咁佢就即刻叫我哋拎文件,分別有,香港身分證、銀行存款證明,冇特別古怪嘢)


嗰日特別嘅嘢就係佢話影印機壞咗,然後我竟然用手機去影我哋嘅文件,而唔係拎文件係老遠嘅影印機去影印(呢一度同其他師兄師姐講嘅唔同,因為大部份人都話呢一part其實係最嘥時間)。咁佢都有利申影低咗嘅文件會即日清,唔會留低我哋資料係佢手機過夜。


隔咗一陣,佢就dump咗三個期待已久嘅LOTR印俾我哋喇。事情就係咁樣發生,冇驚險嘢,冇西面關員留難。


時間大概係清晨七點幾,司機都仲未嚟接我哋返屋企。大家拎完行李,可以出去Costa度買杯咖啡定一定驚(不過我因為唔想除口罩其實就冇買嘅),而其他舖頭大部份都係閂咗門嘅,所以唔好諗住可以堂食。





呢條片係窮媽打坐喺Book咗嘅車,離開Heathrow機場影嘅,嗰一刻嘅心情,有一種Argo套戲最後架飛機起飛咗,成功逃出嘅感覺。(當然而家㗎飛機係降落)


通常啲戲做到最後,就係主角昂首咁樣望去遠方,事實上我哋形體上冇咁誇...但係精神上,確係嗰一種熱血情懷:


「...那怕去到遠遠那方

前程盡願望 

自命百煉鋼

淚下抹乾 

敢抵抗高山 

攀過望遠方...」


#末代港英窮媽打

Facebook : https://www.facebook.com/HKmotherfighter2UK

#HKmotherfigher2UK#港英

#BNO

#LOTR

150 次瀏覽0 則留言

最新文章

查看全部