過嚟英國讀書就要有準備 !!跳班之後的惡夢!!

更新日期:2020年11月30日

大家好,小編係兩個仔嘅媽媽﹐嚟咗英國已經有兩年。之前大仔係香港讀完 K2 就過嚟英國。一心諗住俾佢適應環境學習,所以搵咗一間位於國家公園中間嘅私立學校俾佢讀 Reception,但點都諗唔到就係因為呢個決定令到佢由天堂跌入地獄。

首先佢喺 Reception 嘅學習生活真係好開心,日日笑住口放學。返學第一日就同我講 "媽咪,呢間學校唔使寫字,淨係玩"。呢間位於國家公園中間嘅私立學校,本身就有個森林,可以比學生喺大自然裏面學習,例如生火燒棉花糖,用喺樹林執到嘅栗子去學數學﹐學習木工 (比錘仔同埋鋸佢去鬥木) 等等,好多好好玩嘅活動。



(圖:個間喺國家公園中間嘅私立學校嘅後花園)

但因為我先生工作關係我哋需要搬去另一個城市﹐加上細佬開始,大需要將資源重新分配。所以我哋轉去讀當地一間 Ofsted rating 係 Good,而且考試成績公布係幾好嘅公立學校,從此惡夢開始...

首先英國公立學校係根據學生嘅出身月份去斷定佢係屬於邊一級。以大仔為例,佢係八月尾出世,佢就成為英國制度下嘅細B (下面有列表可作參考)。學校要求佢升讀Year 2....Oh my god, 上年係疫情下,佢 Reception 都只係讀咗半年多啲﹐Year 1都未讀,點升 Year 2? 當佢神童咩?

係全英文嘅環境下,佢聆聽﹐說話完全冇問題。但係寫作,閱讀就死晒。係 Year 1 要學嘅 Phonics Sound Set 佢冇學過所以唔識﹐寫作嘅方法唔識﹐作英文詩句唔識﹐做Project 嘅方法唔識。一個小朋友用咁短時間追番年半課程差距係咪真係有啲困難呢? 我覺得係囉,但冇辦法,唯有努力追。

喺呢度想同將會帶埋小朋友過嚟讀書嘅家長講,你地要有心理準備,小朋友有可能要跳班。家長真係需要陪小朋友一齊學習﹐公立學校師生比例一般來講比私立學校為高,正常一班會有30個小朋友,但係得一個老師加一個助教,俾你咁好彩搵到間學校係 Half-Form Entry。老師好難每一個同學都照顧得到﹐私立學校老師同公立學校老師對小朋友關注度分別真係很大。私立學校老師至少每一個禮拜會一次同你交代小朋友喺學校嘅進度,但公立學校除咗家長日就冇啦。日後我有能力我都希望佢可以讀返私校。

依家同大家講一講小朋友升讀英國學校嘅要點!

英國 Nursery 其實兩歲至四歲都可以讀,三歲之前要自費。

當小朋友足三歲嘅時候,就可以享用英國政府提供嘅15小時免費學前教育服務去讀 Nursery。額外時間可以自費加鐘。俾個例子你參考吓: 我個細仔出年二月就足三歲,其實之前就應該搵定 Nursery,等佢生日就開始享受嗰15個鐘頭免費教育﹐完完全全係可以插班﹐唔會好似香港咁需要等到九月齊齊開學。

另外,呢度嘅小朋友大部份都會選擇四歲開始入讀全日制學校,當然亦有半日制可以選擇。有部份家長會等小朋友足五歲先讀全日制學校,而五歲就係法定必須要入讀全日制學校嘅年齡。記得早啲同 Council 同埋學校安排入學。



如果要插班嘅話,就記得download定下面個 英國入學年齡對照表,大家過嚟之前幫小朋友睇定係要報讀邊一個年級啦。


如果要搵英國學校嘅資料就可以去 British School Portal

輸入地址,撳個搜尋制就會顯示晒附近嘅學校出嚟

中文版 https://bit.ly/2Voop5j

英文版 https://bit.ly/3mlA6G5


BSP_英國入學年齡對照表 - 2020:21年度版本
.pdf
Download PDF • 261KB

1252 次瀏覽0 則留言