關於睇屋二三事

更新日期:2020年11月17日


今日抽起條筋去rightmove 望下區內附近啲屋,我都幾鍾意八下同區其他屋喺點,睇吓人哋點做extension,定價等,睇屋娛樂都應該算係香港人嘅習性。以下就係我一啲都唔專業嘅睇屋經驗,純粹分享😅。


我呢區嘅屋閒閒地都八九十年,英國好多地方都係咁,不過唔駛俾樓齡嚇怕。戰前屋係出名用料好,用實心磚唔偷工減料,我住咁耐喺屋入面都無聽到過隔離任何聲音。不過至於個别屋質素如何,就好視乎屋主幾肯花錢去保養,維修同增值間屋啦,呢啲都會好明顯反映喺價格上。


對我黎講,舊屋嘅唔好處主要係原有間隔末必啱用,有時甚至屋細花園大,廁所啲花灑浴缸又唔係好啱位,在所難免要整過。不過好處就係好多舊屋都仲有發展空間,花園可以做extension變相加大個廳,又或第日有需要可做side extension,loft conversion,造多間房同廁所出嚟都得,不過呢啲當然都需要💰 💰 💰啦。


留意呢邊攪裝修好煩,我哋搬黎時就好天真咁買咗間基本屋去大改造。不過好多事情都始料不及,雖然最終完成但過程都幾慘痛,所以新手移民唔想太大壓力的話,最好唔好玩咁大住😅。


至於近代起嘅新屋,保暖就一定做得比舊屋好,energy efficiency 又高,但都聽聞過用料單薄,有聽到隔離嘅問題,所以都要留意下。另外新屋間隔實用,但亦由於每寸空間已用盡,發展好哂,一般都唔會有做extension嘅可能性,花園亦因此比一般舊屋細,不過細都有細好嘅☺️。


睇返轉頭,如果俾我再黎過的話,買邊都好,唯一就肯定唔會再自己做大裝修😅。寧可將預算嘅裝修費用黎買已經做好extension 嘅屋仲好。極其量改下個廁所油下油算,雖然會貴啲但就過程一定舒服順利得多了,唔知過來人又覺得如何呢?😊


以下圖片黎自Rightmove. (上:舊conservatory, 下:花園extension)






279 次瀏覽2 則留言

最新文章

查看全部