〖🇬🇧離鄉別井之心路歷程分享〗

已更新:2020年12月3日

之前有位朋友仔inbox同我講,話係而家咁嚴峻嘅時期,要拋開一切移居外地並唔係一件容易嘅事,佢考慮咗好耐好耐但都係無勇氣踏出第一步,所以想我分享一下我離鄉別井嘅心路歷程,等佢可以作一個參考,以示鼓勵。藉此,亦希望可以幫到未出發/剛到埗嘅你哋啦~☺️


#長文慎入


講真,我諗咗好耐亦都draft咗好多次,有千言萬語想表達、有千種感情卻用文字表達唔到。我當時離開香港,都係懷住一萬個不捨,因為香港係我由細到大成長嘅地方。係香港,我經歷過廿幾年嘅生活,由讀幼稚園到踏出社會工作;讀書時期嘅種種開心與辛酸、同朋友一齊嘅渡過嘅甜酸苦辣;工作上犯錯誤、捱更抵夜、做得出色而得到重視、遇到種種挫敗、再去自己創一番事業,等等等等,就係呢啲所有經歷與回憶造就咗而家嘅我。雖然,我係因結婚而移民,但係「離開香港」呢一個心情同大家一樣都係不捨不安多過開心。去英國旅行就去得多,但係我深深明明白到係英國生活又係另一回事。


與其要講有咩考慮因素/擔心嘅地方,我反而想分享一下心理上嘅障礙。第一樣最勁嘅障礙係:工作。對於香港人嚟講,工作真係好重要,因為手停就會口停,無計呀~因為香港係一個為生存而生存嘅地方。所以,對於我嚟講,最難放手、考慮得最耐最耐嘅,其實係辭職。辭職後都仲有一段交接期,果段時間都未有實感,真正feel到果種不安同無安全感嘅感覺係last day當日,當你向各位同你出生入死嘅同事遞上散水餅果一刻,你知道今日一走,以後都唔需要再返嚟呢到啦,(而且,臨走果間公司係我同合作夥伴由零開始建立,當中嘅辛酸史,唔係話斷捨離就捨到。)仲有,雖然老公有叫我做少奶奶唔使搵工,但係我都會係到諗,如果真係要返工,我去到英國搵咩工好呢?我可唔可以賺返呢個pay呢?前路茫茫,充滿問號,但係我抱住船到橋頭自然直嘅想法,鼓勵自己俾啲掙扎!


第二樣嘅障礙係:家人朋友。要拋低香港十幾廿年嘅家、家人同識咗好耐嘅朋友出發去地球另一邊嘅地方生活,係一件好痛心嘅事。由我申請VISA去到出發果日,其實得一個月左右,呢一個月真係忙到傻咗。又要忙住見朋友家人,同佢哋食farewell 飯、又要忙執嘢、買必需品、安排搬運,根本都無時間傷心。到臨出發前3日,要準備嘅嘢都準備好哂,無嘢需要再執嘅時候,我先發現原來3日後就要離開香港啦,原來我得返呢2-3日同媽咪一齊食飯咋,食食吓飯都會突然攪住呀媽爆喊出嚟,最唔捨得最放唔低嘅就係媽咪。但係反而最冷靜果個係媽咪,佢仲要安慰返我話「之後好快會再見㗎啦!傻女!」你估佢真係咁諗得開咩,其實佢都好唔捨得我,不過佢知道如果連佢都喊埋,我就會更加唔捨得走。(打到呢到,我都仲係會眼濕濕,果種感覺仲係到)


出發果日,我俾咗個大大嘅擁抱俾媽咪之後轉身上的士,望住媽咪嘅身影係街尾消失,係的士上又再次爆喊,明明媽咪已經再三提點叫我唔好喊,結果我喊到嚇親個的士司機😅 直到上咗飛機,由高空望住香港個景愈變愈細,我就真正接受現實 —— 再見,香港。坐咗13個鐘嘅長途機終於到埗英國,到埗果一刻完全無咗果種不捨之情,反而覺得自己好叻女,搞咗咁耐,終於嚟到英國開始新生活啦!心入面不斷同自己講:「加油!Jessica你得嘅!新生活新開始,順順利利!」跟住,又真係好順利地過關兼拎埋行李,一出閘見到老公拎住我最愛食嘅英國西瓜🍉企係到等緊我,我二話不說衝過去攪住佢!「我終於嚟到英國join你啦!❤️」就係咁,我係英國嘅新生活開始咗喇~!🇬🇧


剛剛到達,見到好多新事物當然開心、當然興奮,就好似新婚蜜月期咁。不過,好快地大約去到第二~三個月開始我就出現Homesick現象,成日自己一個偷偷地喊😢 成日好想返香港,好掛住香港嘅一切(包括雲吞麵)。不過,我知道最緊要唔好俾自己沉淪落去,搵啲嘢做吓分散注意力,所以我就開咗呢個page同埋YouTube,一來可以紀錄一下自己嘅新生活,二來可以同大家傾吓計咁,我都好開心可以係呢到識到好多朋友仔 🥰 所以,只要成功撐過呢段時期就會真正適應㗎啦~💪🏻


「天下無不散之筵席」,無失又邊得吖~其實,要踏出comfort zone 一啲都唔容易,更何況係去另一個國家生活,好多嘢要重新適應、重新學習。我好好彩有個係英國住咗好多年嘅老公陪伴我去適應新生活,所以我都適應得快啲。因此,我希望可以係呢到帶俾大家正能量同勇氣,俾一個平台大家去溝通,今次換我做老公嘅角色,陪伴一下大家。有時會覺得:「鼓起勇氣踏出咗comfort zone之後先發覺,原來之前果個zone都唔係咁comfort姐~ 」係英國,我可以享受自由嘅生活、呼吸自由嘅空氣(雖然而家要帶口罩),亦好興幸自己有呢個決心同勇氣踏出去,享受世界嘅另一邊端~我得,大家都一樣都得💪🏻 希望大家加油!照舊地,有咩心事/憂慮仍然可以搵我傾,希望可以俾到鼓勵大家,一齊加油💪🏻


好多謝睇到呢到嘅你,雖然我可能打到1999,完全唔係心路歷程,但係離別果種心情唔係用文字可以表達到,夾雜住心酸與痛苦。不過我知道,苦後便是甜,希望到咗埗嘅你會喜歡英國嘅生活,未出發嘅你可以鼓起勇氣向前踏一步,你就自自然然知道條路要點行㗎啦❤️

————————————————————————

🔻瀏覽更多英國資訊🔻

instagram @jessica_uklife:

https://instagram.com/jessica_uklife

YouTube @Jessica_UKLife :

https://www.youtube.com/c/JessicaUKLife

Facebook @Jessica_UKLife:

https://www.facebook.com/jessica.uklife

MeWe @Jessica_UKLife:

https://mewe.com/i/jessicauklife

★港英匯館 Blog ★

https://www.hongkongers.co.uk/profile/jessicauklife

回帶睇 ☆Jessica_UKLife☆其他文章:

https://www.facebook.com/109122070867681/posts/156494026130485/?d=n

400 次瀏覽0 則留言

最新文章

查看全部