頭文字P雪藏車手最真誠的告白

已更新:1月 26

窮媽打一直引以為傲嘅,就係喺香港好多年前考到個棍波牌。之後喺香港揸咗一年車多啲,因為架前七要入廠,就乘機放棄撫養了,繼而做咗Uber 嘅大客仔,過份到間中會搭Uber返工放工,覺得咁樣坐車,爽過養車。


窮花打駕駛經驗值就更甚,當年佢肥咗棍波後,我迫佢都要考埋個車牌,佢就轉戰自動波了,總算成就解鎖,實戰經驗就只得幾次咁多。當知道過來英國,如果冇車會好難過生活,抽一口氣涼氣外,也要硬住頭皮操一操佢 (講緊架車),以下係一啲貼士俾同我哋一樣咁生手嘅你。





1/ 補鐘免不少


講一切之前,如果你係好似我哋,雪藏牌,為己為人,麻煩你真係喺香港補咗鐘先。窮花打喺出發前,就搵師傅補咗兩次鐘。貨金大概HK$350 /45分鐘(最少兩堂) 啦,可以自己要求操啲咩嘅。窮花打因為等同於零經驗,所以就要求師傅一次係教正常操作番一架車,另外一次就係操泊車。雖然呢邊地方大香港好多,但呢一點都好重要,後面再講。


2/ 唔駛威,最好戴頭盔


英國路面概況,如果唔喺公路,其實大部份司機嘅駕駛態度係好好嘅,大部份車都唔會啄尾,爭入線,咁耐以嚟,真係未試過。然而,公路啲車都會片啲同狼啲,大家上公路就要額外提神。


之前都有提到,我哋都突登貼咗個P字,亦都有"小孩在車上"字眼的Signage,戴定個頭盔,咁就可以減少不必要嘅行車壓力。


3/ Bus Lane 巴士線請勿踐踏


香港冇呢一個concern,但係就係連駕駛老手都會好易中呢個伏。


原來有啲係橫街窄巷,似係挖頭路,以為兜咗入去,此路不通最多兜番出嚟,錯喇,原來地面寫住係Bus Lane。入錯咗巴士線啫,唔覺嘅,你睇我唔到,最多架車出番嚟⋯⋯? 就錯喇,因為呢個世界係有天眼。。。好多巴士線都已經裝咗鏡頭,好快嚟自Council嘅罰款通知書就會直送你屋企,誠惠 £60 。


收到信,就唔好兩頭望喇,速磅的話罰款即減至 £30 ,但就如果28日內都唔找數,就可能引致更高嘅罰款。


4/ 迴旋處的使用法則


喺香港我記得較大嘅迴旋處有藍田嗰個,我第二次路試嘅時候就常常喺嗰邊練車。英國呢邊呢,更大嘅迴旋處都有,更小的都唔少,都幾鬼興迴旋處呢味嘢。


新手上路,特別係入咗黑,睇唔到路面嘅交通線,的確係覺得有點難啊。


我就有一次入咗黑出超市,因為英國嘅交通燈都冇香港咁燈火通明,當時亦都的確未熟路,出迴旋處嘅時候,感覺相當差,好似只是心存僥倖才過骨咁。


那晚我返到屋企,心生不忿,痛定思痛地打開google map路況⋯⋯


哦,立即茅塞頓開了。因此,早上出多啲車,英國街燈好弱的。

Handle大迴旋處,最好先了解路況 (似是廢話,但係係事實);Google Map亦會提你,"Please select the 1st line in the roundabout" (咁上下),大家認得路嘅最好預早入啱線先,入到 Roundabout 都要掌握及留意四方八面嘅車;唔好俾錯Signal人哋。


入迴旋處嘅第一條line係講最左邊,第二條通常繼續直行,第三條就轉右。(應該係,除非唔係)慢慢熟習,減少恐懼,說不定,不知不覺,迴旋處會成為你嘅好朋友。


5/ 全情「頭入」


大多數人泊車都係尾入。但係英國呢邊好多時都要練埋「頭入」。主要因為大家喺超市血拼後,好多時都要開車尾箱拎貨。所以車頭入就會喺某啲時間有實際需要。


45度頭入,我哋仲未練得成 (慚愧),成日都會險象橫生。正所謂 "Practice makes perfect",除了試多幾次,似乎沒有甚麼捷徑或心經。


此乃我等雪藏車手嘅分享,安全駕駛,身心愉快!


******************************************** Be Water, MeWe請follow: https://mewe.com/p/末代港英窮媽打

港英匯館網誌: https://www.hongkongers.co.uk/profile/hkmfighter2uk/

Youtube Channel,支持我嘅記得subscribe跟手開埋個鐘仔。鍾意片嘅內容就要Like同埋Share喇! https://bit.ly/2WSusjj

Facebook: https://www.facebook.com/HKmotherfighter2UK

372 次瀏覽0 則留言

最新文章

查看全部