不如擁抱


英國政府正式確認BNO lifeboat operation,雖然仍未公佈細節,但已經提供咗一道極大嘅逃生門俾合資格香港人。睇House of Commons直播,見到一眾MP都支持,佢哋喺大是大非嘅題目上咁一致,保持住應有嘅正義感,對香港人嚟講特別難能可貴。

既然有逃生門,咁究竟合資格嘅你又會唔會走呢?大家都知道香港人真係好勇敢,七一仍見好多人行街。唔係有逃生門就一定要使用,好多人可能想留低,因為香港先係屋企。無論如何,都希望想離開嘅朋友可以深思熟慮,問吓自己係咪已經做好接受轉變同挑戰嘅準備。

人到中年,唔少人已經係人生勝利組,下半世無憂。突然要舉家離鄉,去一個陌生地方生活,實在令人忐忑。不過凡事兩面睇,究竟呢個移民機會對你嚟講係「馬死落地行」定係「重新出發」?

豬肉媽係屬於後者,我總覺得接觸新事物係一件刺激嘅事。用香港模式生活咗咁多年,每日追趕跑跳碰,好多無謂嘅競逐與比較。每日返工掛住二郎,放工為功課對佢竭斯底里,瞓醒又返工。星期六、日唔想出街,因為已經好攰,條街好迫,又或者星期一要默書測驗。其實呢種生活令人幾窒息,但我都明白成功須苦幹嘅道理。不過我成日問自己,係咪要等到退休先至可以選擇自己喜歡嘅生活模式?

移民除咗為下一代,同時亦都為自己。俾一個機會自己從新尋找自我,讓自己下半世可以「生活」一吓。冇錯,嚟到英國,好多生活細節要從新調較適應:

冇得飲茶食點心? 飲Earl Grey食scones一樣開心。 英國人效率好慢? 好嘢!我都可以慢活喇! 英國地方咁大要揸車喎!咁咪有藉口學新嘢囉!

講呢D唔係叫大家做阿Q,而係既然選擇咗移民呢條路,就應該積極面對,努力融入當地生活。如果繼續怨天由人,嫌呢樣嫌嗰樣,又要求英國人遷就你甚至照顧你,咁你去到邊都唔會開心,做鬼都唔靈。

路係人行出嚟,新生活當前,我選擇擁抱,你呢?

#份人工好貴但自由價更高 #你覺得仲有半杯水定係只剩半杯水 #自由活著每一天

47 次瀏覽0 則留言

最新文章

查看全部