《即刻青春》

《即刻青春》

每年與叱咤的約定,已經來到第三年要在英國網上觀看。以往廿年,無論在香港還是在英國,太太都會不慌不忙地等睇Show等入場,因為事前奸商總會碌盡人情牌「撲飛」。就算移民後,也會搵定Link,set 好架步一家睇電視網上直播,太太從不需要擔心。

2022年1月1日,第一個早上醒來聽到的第一句說話:

 

奸太:「喂!有冇叱咤Link呀?」

奸商:「吓?唔知喎?仲有5~6個鐘先開波,未搵喎!」

奸太:「你而家起身快啲搵下,跟住Send俾我!」

奸商:「吓?上my903.com應該有喇!你急咩呢?開Show前我實準備好,你定喎!」

奸太:「識唔識聽中文呀?我要『Link』呀!唔係『定』呀!搵到即刻Send俾我,係『即刻』呀!」

 

原來,太太這麼多年來身邊的數個八婆Group,都紛紛變成鏡粉Group。呢幾堆八婆,有啲我都識左好多年,就係唔知佢地原來都會聽廣東歌。明明大家各自身處澳洲香港新加坡英國加拿大,時差差足廿四小時,咁都要約埋一齊做應援。而太太竟私下承諾搵Link俾班八婆,結果責任又在我身上。

從上年的主題《一切從音樂再開始》起,今年的廣東歌市場可謂百花齊放,由「咩話」牽引的廣東歌風潮正宗席捲全球,見到所有新認識的新朋友,唔知開咩話題時,開「咩話」既題講「咩話」的歌,包有人接下去。

無可否認,「咩話」讓很多香港人給予廣東歌一個機會,讓香港樂壇再開始。

生力軍今年實力雄厚,張天賦曾比特張蔓姿都是奸商上年的歌單常客。當然還有MC $oHo & KidNey,除左紅到爆裂的《係咁先啦》之外,首《Black Mirror》直情唱出我心聲,現在是開車第一首必播歌,希望兩個寶貝女能快啲一齊唱。也希望他們能成功接棒軟硬艾粒,做多些不一樣的廣東歌。

C AllStar 的《人類世》失落至尊唱片有點可惜,好想見到監製上叱咤台,不過力壓「咩話」拎組合金獎,證明江湖地位仍在。至於「我最喜愛組合」,這些年頭,很難與「咩話」正面交鋒。不過,無論世事如何變,我一直都會是個 C AllFans,C AllStar 一直都是「我最喜愛組合」,沒有之一。

說到「我最喜愛」,無論是女歌手鄭欣宜或男歌手姜濤,他們的聲線未必是最好,台風未必最穩,但他們都勝在夠「真」。「真」這個特質現時很罕見,特別是在演藝圈當中。如果要說一個香港文化與隔壁文化的差異,那必然是這份對「真」的追求。

話說頒獎禮去到中段,剛頒完叱咤十大第二位俾「咩話」,太太電話瘋狂叮叮叮,所有八婆提前興祝姜濤首《Dear My Friend》拎至尊歌曲。

 

奸商:「不會吧!不可能!以我認識的 903 ,不會的!我唔信!」

奸太:「長江後浪推前浪,下一句係咩呀?係前浪死在沙灘上呀!你呢啲唔肯接受新事物既老前浪!」

 

阮小儀:「叱咤樂壇至尊歌曲大獎,《Ciao》 RubberBand!」

由阮小儀讀出RB的那一刻開始,已經喊到收唔到聲,再到六號同黎猛的感言,再一次提醒我們,2021年有多麼的不一樣,有多麼的大改變。第一次,與全球的好友八婆,不計時差,一齊同步去用心聽著「這刻我們在一起,笑喊悲喜,巨浪翻起,亦是在一起」的感動。

多謝叱咤903,多謝香港樂壇,多謝廣東歌,多謝「咩話」!

「無論身處何地,我地永遠都係香港人!」



47 次查看0 則留言

最新文章

查看全部