帶飯返學

之前有媽咪問帶飯返學嘅事情,我自己用保溫飯壺pack lunch,最大原因係因為二小姐唔食三文治(佢乜都食㗎,就係唔知點解唔接受三文治)😅,所以我都冇得偷懶唔煮飯啦。


至於其他同學仔,好多之前都食school lunch嘅,但covid 後好多都自己帶簡單三文治。我兩個剛到步時都抱住興奮心情訂學校午餐,不過失去新鮮感後就要求食番屋企飯了😆,所以佢哋都食過一排school lunch㗎。


會唔會因食嘅嘢同大家唔同而唔開心?或者覺得自己唔夠融入呢?咁又唔會喎,佢哋自己選擇帶飯㗎嘛。其中原因可能佢兩個都已經係中童(Yr 5&6),又有固定玩嘅一班朋友,一早已非常融入,唔會太緊張所有嘢都要同所有人”一樣”掛。


另外我呢區本身都較多種族,大家從細生活環境裏都見慣唔同人,可能接受能力會高啲,唔同食物應該都係好閒事。據報都有另一男生帶thermos飯壺,不過佢係印度人當然就食印度咖喱啦😅。


出乎意料之外,最近識有個英國出世嘅印度媽咪,細個因爸爸派駐香港關係,都曾跟家人住過香港幾年😲。另外亦有一位英國爸爸喺香港工作過,又有巴基斯坦媽媽有親戚喺香港,嚟過旅行。原來我呢個小區都有唔少人同香港有少少關係㗎。


至於會唔會因帶中式食物惹人返感呢?🤔🤔。以我所知反感就冇,好奇問吓咩食物都有。我通常都係用分層保溫壺,餸配飯,蔬菜就醃黃瓜,蕃茄仔,彩椒等,除中餐外有時都整飯團,炸雞,意粉,焗薯乜都有。我諗前題都係唔好帶大陣味或者太嚇人嘅內臟啦😅。


好攪笑,尋日帶嗰幾件壽司三文治,都真係包得幾大,隔離男同學就驚嘆 Wow! This is the biggest sushi I’ve ever seen🤣. 又試過帶蒸水蛋,同學非常好奇問做乜啲蛋咁似溜冰場嘅😲。而最好笑都莫過於有人話大小姐咁講究,日日帶3 course meal 返學囉😜。


超級大sushi sandwich 😅






64 次瀏覽0 則留言

最新文章

查看全部