我中咗獎😁

已更新:2020年11月2日


好耐之前有日有個靚仔拍門,問我有冇興趣每月捐少少錢俾附近一個叫St Luke’s Hospice 嘅機構。當時我都未知咩嚟,後來佢解釋一輪我先知係照顧老人家同末期患者嘅機構。


其實佢之前我已經回絕過一個露宿者機構,同另一個青年機構,因為剛剛搬黎時每月都有好多嘢要整要駛錢,如果多我就真係俾唔到了。不過同靚仔傾完,原來佢哋可以接受非常小額嘅捐助,每兩星期定額捐少少就得,真係捐咗都唔覺,所以嗰次我都即時登記咗卡資料做自動轉賬。坦白講能夠用少少錢定期做到善事,都係一個難得機會嚟㗎😊。


唔經唔覺,原來都已經捐左一年有多,前幾日見枱面有封在角落遺忘咗嘅信,係St Luke’s 寄黎,好攪笑原來我中咗獎,有£10呀😆!係喎,當初登記時靚仔都有講過每月捐款人會自動參加一個抽奬乜乜物,呢啲咁虛無漂渺嘅嘢我都無在意,原來真係有㗎😅。


順帶一提,呢種拍門登記卡資料嘅捐款方式其實好危險嘅,我之後都收到council 寄黎嘅電郵通知呢啲係騙徙常用手法。後期可能大家都知道,已經唔見有機構再用呢種方式募捐。如果大家有日真係遇到呢個情況又擔心中招的話,亦可以叫對方講低網址,同佢講研究完再決定,需要的話自己上網登記就可以啦! 😊





127 次瀏覽0 則留言

最新文章

查看全部