逃過一劫

Covid 呢件事這麼近又那麼遠,不過早兩星期奶奶都中咗招。好彩有驚無險,今日出院啦⋯⋯


講番呢兩星期,奶奶同其他親人同住,而其中一位親人由於喺工作地方感染到,就咁就帶咗返屋企啦。


發病時頭幾日最辛苦,奶奶形容發冷發熱周身痛,又多痰塞,隨後幾日就超攰。佢有個中醫朋友,送咗好多包藥俾佢,呢段時間都係靠中藥同休息,冇乜可以做。心理狀態都緊要,奶奶心情ok,唔係話太唔開心,不過就當然冇哂精神。


Covid test kit可以郵遞索取寄回又或可揸車去驗,全程唔使落車,結果會有短訊通知。海外嘅家人呢啲時間就最擔心,近乎情緒爆炸,因為覺得完全冇嘢可以做到,不過其實身處何方都冇大分別,都一樣只能靠電話聯絡。


屋企唯一可以做嘅就係用pulse oximeter量住血含氧量,呢款Nonin 9590-BK口碑較好,中價,Amazon 可以買到,讀數低過92%已經可以打999。有晚奶奶呼吸吃力,111就話可以即時call 白車。


救傷車好快到,十分鐘就到醫院。比起好多人奶奶情況都唔算太差,第二朝仍可坐起身食早餐,不過最辛苦佢話係隔離床個病人好嘈,晚晚無得瞓😥,呢件事真係好折磨。


喺醫院呢幾日主要係食steroid

(dexamethasone tablet ),聞住氧氣,仲有注射enoxaparin ,薄血用。醫生話好多時covid 會導致blood clot,所以要留意腳有冇腫。另一好彩就係遇到個香港醫生,咁奶奶未至於雞同鴨講。雖然冇得探病,冇得見醫生,不過有疑問可以請醫生打黎講情況嘅。


前日開始奶奶血含氧量去返98%,可以出院,電話把聲都有番啲精神。非常時期醫院仲有專車接送回家,好週到😅。由於錯過咗第一輪打針,醫生話確診後第四星期可以安排再打,希望唔好再中招啦,大家都要事事小心,唔好鬆懈呀。



92 次瀏覽0 則留言

最新文章

查看全部