濕氣


前幾日發現二小姐間房天花滲水,即時諗到一定係屋頂瓦片問題,今次大鑊啦,又要花一筆🤯。


今日下午約咗以前幫我哋整屋嗰個木匠D先生嚟睇吓乜事,佢經驗唔止木工,基本上係乜都識嘅。原來唔係屋頂問題,啲水漬係房間內濕氣造成嘅。因為二小姐間房位置喺街角位,食正兩邊風,凍之餘又冇air brick通氣,平時內暖外凍所以濕氣特別嚴重。


我哋再一齊去屋外視察,見主人房氣窗上面外牆有行發黑嘅痕跡,原來亦係潮濕造成。由於主人房都冇air brick,所以我有時會打開隻氣窗特意排走濕氣,不過冇諗過房內無事但外牆卻因為咁黑咗一達😅。


至於屋頂,的確係有部份瓦片損毀,木邊亦好殘舊但未至於有事,所以D先生建議佢可以幫我哋換咗損毀嗰部份同清走啲碎瓦就得。至於二小姐房同主人房就建議加空氣磚,因為只要空氣恆常流通就可解決濕氣問題,我亦唔需要再打開氣窗啦。另外二小姐房亦要剷過再油,需要的話可考慮喺窗邊再下加裝多一塊暖板,希望問題徹底解決啦!


以前香港生活,我覺得有相熟醫生同相熟律師最緊要,黎到英國,我反而覺得有個相熟builder 最重要😅。特別係住屋維修方面,問題可能會不定期出現。如果有機會遇到一個有經驗又誠實可靠嘅人,大家一定要好好經營呢段關係,因為有生之年大家仍可能不停見面😂,收費反而都唔係最重要,合理已經足夠。搵到個有商有量,真正解決到問題嘅人係可遇不可求㗎!


呢個網後面就係一舊air brick, 磚入面有好多小窿,有助內外空氣流通,減少濕氣。




343 次瀏覽2 則留言

最新文章

查看全部